ԵՄ-ում հունիսի 25-ից կփակվի ռուսական մի շարք լրատվամիջոցների կայքերի հասանելիությունը
Քաղաքականություն
24.06.2024 | 19:28ԵՄ Խորհուրդը հավանություն է տվել ռուսական չորս լրատվամիջոցների կայքերի մուտքի արգելքին, որոնք, ըստ եվրոպական իշխանությունների, «էական և ուղղակի վտանգ են ներկայացնում ԵՄ հասարակական կարգի և անվտանգության համար»: Այս որոշումը հունիսի 24-ին հրապարակվել է ԵՄ պաշտոնական ամսագրում, գրում է Meduza-ն։
Դրանում ասվում է, որ հունիսի 25-ից ԵՄ-ում սահմանափակվելու է մայիսի 17-ի կանոնակարգի հավելվածում թվարկված բոլոր կազմակերպությունների մուտքը։ Դրանք են՝ ՌԻԱ Նովոստին, Իզվեստիան, Ռոսիսկայա գազետան և Voice of Europe-ը։
Կայքերի հասանելիությունը կփակվի որպես «Ուկրաինայում իրավիճակն ապակայունացնող ռուսական գործողությունների» հետ կապված սահմանափակող միջոցների մաս։
ԵՄ հայտարարության մեջ ասվում է, որ պետական վերահսկողության տակ գտնվող նշյալ ռուսական լրատվամիջոցները զբաղվում են քարոզչությամբ և «կարևոր դեր են խաղում Ուկրաինայի դեմ Ռուսաստանի ագրեսիվ պատերազմը հրահրելու և աջակցելու, ինչպես նաև հարևան երկրներում իրավիճակն ապակայունացնելու գործում»։
Եվրամիությունը նշել է, որ չի արգելում նշված լրատվամիջոցներին և նրանց աշխատակիցներին ԵՄ-ում զբաղվել հեռարձակման հետ կապ չունեցող այլ գործունեությամբ, ինչպիսիք են հետազոտությունները և հարցազրույցները։
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Ռուսաստանը կպատասխանի ձեռնարկված միջոցներին։ Նա նշել է, որ Մոսկվան մշակել է պատասխան միջոցներ, որոնց մասին հայտարարվելու է առաջիկայում։