01.05.2026 | 10:00
Մայիսի 2-ից 5-ը Երևանում որոշ փողոցներ փակ կլինեն
ՀԱՊԿ-ը կօգնի Ռուսաստանին՝ Դաղստանում տեղի ունեցած ահաբեկչության հետ կապված Մոսկվայի դիմումի դեպքում
Քաղաքականություն
24.06.2024 | 17:35
ՀԱՊԿ դաշնակիցները մի կողմ չեն կանգնի, եթե Ռուսաստանն օգնություն խնդրի Դաղստանում տեղի ունեցած ահաբեկչություններից հետո։ Այս մասին ՏԱՍՍ-ին տված հարցազրույցում հայտարարել է ՀԱՊԿ գլխավոր քարտուղար Իմանգալի Տասմագամբետովը։
«Ներկայում քարտուղարությունը Ռուսաստանի Դաշնությունից օգնության դիմումներ չի ստացել։ Ռուսաստանն ունի իր սեփական ներուժն ու փորձը նման խնդիրները հաջողությամբ լուծելու համար։ Զգալի է նաև երկկողմ միջգերատեսչական համագործակցության ներուժը։ Սակայն ես վստահ եմ, որ եթե Ռուսաստանն օգնություն խնդրի, դաշնակիցները մի կողմ չեն կանգնի»,- ասել է նա։
Ըստ ՀԱՊԿ գլխավոր քարտուղարի՝ խորը ցավով են ընդունել Մախաչկալայի և Դերբենտի ողբերգական իրադարձությունների մասին լուրը։
«Մենք խստորեն դատապարտում ենք ահաբեկիչների գործողությունները և միջկրոնական ատելություն հրահրելու ցանկացած փորձ։ Նման հանցագործություններն արդարացում չունեն»,- ընդգծել է Տասմագամբետովը։
Թարմացված վերջին տվյալներով՝ Մախաչկալայում և Դերբենտում ահաբեկչությունների հետևանքով մահացել է 20 մարդ։
«Մախաչկալայում և Դերբենտում երեկ տեղի ունեցած ահաբեկչության հետևանքով տուժել է 46 մարդ՝ ինչպես քաղաքացիական անձինք, այնպես էլ իրավապահ մարմինների աշխատակիցներ։ 7 վիրավորների վիճակը ծանր է։ Ցավոք, զոհվել է 20 մարդ, այդ թվում՝ իրավապահ մարմինների աշխատակիցներ և քաղաքացիական անձինք»,- հայտնել է Դաղստանի առողջապահության նախարար Տատյանա Բելյաևան։
