Երուսաղեմի եկեղեցիների ղեկավարները դեմ են հարկեր սահմանելու՝ տեղական իշխանությունների որոշմանը

Երուսաղեմի տարբեր քրիստոնեական եկեղեցիների ղեկավարներ միավորվել են՝ ընդդիմանալով Երուսաղեմի քաղաքապետարանի՝ եկեղեցական գույքի վրա մունիցիպալ տուրքեր սահմանելու որոշմանը, գրում է The Jerusalem Post-ը։

Պատրիարքների և եկեղեցիների ղեկավարների անունից հրապարակված համատեղ հայտարարության մեջ առաջնորդները խորը մտահոգություն են հայտնել քաղաքապետարանի քայլի առնչությամբ, որը, ըստ նրանց, հակասում է եկեղեցիների և քաղաքացիական իշխանությունների միջև դարավոր պատմական պայմանավորվածություններին:

«Մենք հայտարարում ենք, որ նման միջոցը խարխլում է Երուսաղեմի սուրբ բնույթը և վտանգի տակ է դնում Եկեղեցու կարողությունը՝ իր ծառայությունն իրականացնելու այս երկրում իր համայնքների և համաշխարհային եկեղեցու անունից»,-ասվում է հայտարարության մեջ։

Նշվում է քրիստոնեական եկեղեցիների զգալի ներդրումը Երուսաղեմում, ներառյալ՝ դպրոցներում, հիվանդանոցներում, ծերանոցներում, անապահով խավերի համար նախատեսված հաստատություններում՝ հավելմամբ, որ քաղաքացիական իշխանությունները պատմականորեն ճանաչել և հարգել են այդ ներդրումները:

Եկեղեցիների ղեկավարները կոչ են արել Երուսաղեմի քաղաքապետարանին՝ հետ կանչել որոշումը և պահպանել պատմականորեն հաստատված ստատուս քվոն։

Հայտարարությունը ստորագրած եկեղեցիների առաջնորդների թվում է նաև Երուսաղեմի Հայոց պատրիարք Նուրհան Մանուկյանը։

Երուսաղեմում եկեղեցական ունեցվածքի մունիցիպալ հարկերի շուրջ հակասությունը շարունակվում է արդեն մի քանի տարի։ 2018 թվականին Երուսաղեմի քաղաքապետարանը հայտարարեց, որ մտադիր է 650 միլիոն հարկեր հավաքել եկեղեցիներին պատկանող գույքից, որոնք չեն օգտագործվում որպես աղոթատներ: