Քաղտեխնոլոգները՝ Երևանի ավագանու ընտրություններում հաղթող ուժերի առաջին եռյակի մասին․ ՏԵՍԱՆՅՈՒԹ

Քաղտեխնոլոգ Արմեն Բադալյանի համոզմամբ՝ Երևանի ավագանու ընտրությունների վրա կազդեն ինչպես վարչապետի բարձր հեղինակությունը, այնպեսլ էլ հետհեղափոխական էյֆորիան, որն էլ օգուտ կբերի ընտրություններին մասնակցող ուժերից մեկին։ 

Այսօր հրավիրված մամուլի ասուլիսի ժամանակ նման տեսակետ հայտնեց քաղտեխնոլոգ Արմեն Բադալյանը՝ ընդգծելով, որ ընտրություններին մասնակցող ուժերից բավականին բարձր՝ 50 տոկոս ձայն կարող է հավաքել «Իմ քայլ» դաշինքը։ 

«Բարգավաճ Հայաստանը, հավանական է,  կզբաղեցնի 2-րդ տեղը՝ ունենալով կուսակցության ղեկավարի հեղինակությունն ու մեդիառեսուրսը, 3-րդ տեղի համար պայքար կգնա «Լույս» դաշինքի և  Հայ Յեղափոխական Դաշնակցության միջև։ Հնարավոր է նաև պայքար ծավալվի «Լույս»  դաշինքի և ԲՀԿ-ի միջև՝ 2-րդ տեղը զբաղեցնելու համար։ ՀՅԴ-ն ունի կայուն ընտրազանգված, իհարկե, սակայն չի հաղթի, ընդամենը նշաձողը՝ 6 տոկոսը կանցնի»,- ասաց քաղտեխոնոլոգը՝ նշելով, որ նախկինում եղած կամ նոր ձևավորված մյուս կուսակցություններն ու դաշինքները, հավանաբար, չեն անցնի սահմանված շեմը։ 

Ասուլիսին մասնակից քաղտեխնոլոգ Վիգեն Հակոբյանի խոսքով էլ՝ ավագանու այս ընտրությունների յուրահատկություններից մեկն այն է, որ մասնակցող ուժերից ոչ մեկ չի դիրքավորվում որպես ընդդիմություն։

«Սրանից բխելու են նախընտրական մարտավարությունները, բայց, քանի որ, առաջիկայում սպասվում են արտահերթ խորհրդարանական ընտրություններ, դժվար թե իշխող ուժի հետ բաց դաշտում լինի մեծ մրցակցություն․ կարծում եմ բոլոր ուժերի համար որպես թիրախ լինելու են նախկին իշխանությունները»,- ասաց Վիգեն Հակոբյանը։ 

Մանրամասները՝ տեսանյութում։