16.03.2026 | 17:12
Քննարկվել են զբոսաշրջության ոլորտում համագործակցության զարգացման հնարավորությունները. ավարտվել է MITT 2026 ցուցահանդեսը
Հունիսի 21-ին կհայտարարվի Ադրբեջանի խորհրդարանի լիազորությունների վաղաժամկետ դադարեցման և արտահերթ ընտրությունների նշանակման մասին
Քաղաքականություն
20.06.2024 | 17:04
Ադրբեջանի Միլլի Մեջլիսի հունիսի 21-ի արտահերթ նստաշրջանում ակնկալվում է որոշում ընդունել խորհրդարանի լիազորությունների վաղաժամկետ դադարեցման և արտահերթ խորհրդարանական ընտրություններ նշանակելու մասին։ Այս մասին ադրբեջանական Թուրան գործակալությանը հայտնի է դարձել խորհրդարանական աղբուրներից։
Այս տեղեկությունն անուղղակիորեն հաստատում է խորհրդարանում մանդատների բացարձակ մեծամասնություն ունեցող, երկրի նախագահ Իլհամ Ալիևի ղեկավարած «Յենի Ադրբեջան» կուսակցության այսօրվա փակ հանդիպումը։
Ըստ ամենայնի՝ հենց իշխող ուժն էլ նախաձեռնելու է խորհրդարանի ինքնալուծարումը։ Դրանից հետո Մեջլիսը կդիմի նախագահին՝ արտահերթ ընտրություններ նշանակելու խնդրանքով։
Հիշեցնենք, որ մայիսին Ադրբեջանի Կենտրոնական ընտրական հանձնաժողովի նախագահ Մազահիր Փանախովը հայտարարել էր, որ ըստ երկրի օրենսդրության՝ խորհրդարանական ընտրությունները պետք է տեղի ունենան այս տարվա նոյեմբերին։ Նա, միաժամանակ, նշել էր, որ ընտրությունները կարող են տեղի ունենալ ժամանակից շուտ։
«Հաշվի առնելով առաջիկա խորհրդարանական ընտրությունները՝ այժմ անհրաժեշտ է որոշակի աշխատանքներ սկսել՝ կապված ընտրական հանձնաժողովների անդամների վերապատրաստման հետ։ Քանի որ խորհրդարանական ընտրությունների ժամանակը համընկնում է COP29-ի հետ, որը հեղինակավոր միջոցառում է և անցկացվելու է Ադրբեջանում, կարող է որոշում կայացվել ընտրությունների օրը փոխելու մասին»,- ասել էր Փանահովը։
Այս հայտարարությունից հետո լուրեր տարածվեցին, որ ընտրությունները կարող են տեղի ունենալ ամռանը։ Սահմանադրության համաձայն՝ 125 տեղանոց Միլլի Մեջլիսի ընտրություններն անցկացվում են հինգ տարին մեկ անգամ՝ խորհրդարանի լիազորությունների վերջին տարվա նոյեմբերի առաջին կիրակի օրը։ Ընտրությունների օրը հայտարարվում է դրանց անցկացումից երկու ամիս առաջ։
Հաշվի առնելով այս հանգամանքը՝ կարելի է ենթադրել, որ արտահերթ խորհրդարանական ընտրությունները տեղի կունենան օգոստոսի վերջին կամ սեպտեմբերի սկզբին։
Էմմա Չոբանյան
