Ադրբեջանում կիբերհանցագործների միջազգային խումբ են բացահայտել, որը կեղծ լուրեր է տարածել Ալիևի անունից

Ադրբեջանի պետական ​​անվտանգության ծառայությունը բացահայտել է կիբերհանցագործների ցանց, որը համացանցում կեղծ հայտարարություններ է տարածել պետական ​​և հասարակական գործիչների, այդ թվում՝ երկրի նախագահ Իլհամ Ալիևի անունից, գրում են տեղական լրատվամիջոցները։

Նշվում է, որ օգտագործելով արհեստական ​բանականությունը, դիփֆեյք տեխնոլոգիան՝ նրանք տեսանյութեր են ստեղծել Ադրբեջանի նախագահի և այլ պետական ​​և հասարակական գործիչների մասնակցությամբ։ Քաղաքացիներին մեծ եկամուտներ են խոստացել SOCAR պետական ​​նավթային ընկերության, Kapital Bank-ի և Ադրբեջանի միջազգային բանկի «ներդրումային նախագծերին» մասնակցությունից, որից հետո նրանց բանկային քարտերից միջոցներ են գողացել։

Պետանվտանգության ծառայությունը քրեական գործ է հարուցել քրեական օրենսգրքի 272.2.1, 272.2.2, 273-2, 178.3.1 հոդվածներով։

Նշվում է, որ բազմակողմանի հետաքննության արդյունքում պարզվել են այն երկրները, որոնց տարածքում կատարվել են կիբերհանցագործությունները, բացահայտվել է միջազգային կիբերհանցագործությունների ցանցը։

Պետանվտանգության ծառայության հայտարարության մեջ ասվում է, որ Ուկրաինայում գործող կիբերհանցագործները քրեական հետապնդման են ենթարկվել տեղի իրավապահ մարմինների կողմից։ Բացի այդ, ձերբակալվել են Ադրբեջանի երկու քաղաքացիներ՝ Ռաֆիգ Զոհրաբովը (ծնված 1998 թ.) և Սարդար Նիֆթալիևը (ծնված 1979 թ.), որոնք ներգրավված են եղել այս հանցավոր արարքի մեջ։ Նրանք կալանավորվել են։

Քրեական գործով հետաքննությունը շարունակվում է։