Էրդողանը ծրագրում է առաջիկա օրերին հանդիպել Պուտինին և Բայդենին

Թուրքիայի նախագահ Ռեջեփ Թայիփ Էրդողանը պատրաստվում է Կուրբան Բայրամից հետո շարունակել միջազգային այցերը։ Haberturk-ի հաղորդմամբ՝ հուլիսի 3-4-ն Աստանայում տեղի կունենա Շանհայի համագործակցության կազմակերպության պետությունների և կառավարությունների ղեկավարների գագաթնաժողովը, որին Էրդողանը նույնպես հրավիրված է։

Գագաթնաժողովի շրջանակում Էրդողանը նախատեսում է հանդիպել ՌԴ նախագահ Վլադիմիր Պուտինի հետ։

«Հանդիպման օրակարգում կլինեն ռուս-ուկրաինական պատերազմը, Սևծովյան հացահատիկային նախաձեռնության ֆունկցիոնալության բարձրացումը, «Աքքույու» ատոմակայանի աշխատանքներում վերջին իրավիճակը, Թրակիայում ստեղծվելիք գազի կենտրոնը և PKK-ի ու YPG-ի, այսպես կոչված, նախընտրական նախաձեռնությունը Սիրիայի հյուսիսում»,-գրում է լրատվամիջոցը։

Նշենք, որ օրերս Կրեմլում Թուրքիայի ԱԳ նախարար Հաքան Ֆիդանի հետ հանդիպմանը ՌԴ նախագահ Վլադիմիր Պուտինը հույս էր հայտնել Աստանայում բանակցություններ անցկացնել Էրդողանի հետ։

Աստանայից հետո Էրդողանը հայաթափված Արցախի Շուշի քաղաքում մասնակցելու է Թյուրքական պետությունների կազմակերպության երկրների ղեկավարների ոչ պաշտոնական գագաթնաժողովին, որը տեղի կունենա հուլիսի 5-6-ը։

Դրանից հետո Թուրքիայի նախագահը մեկնելու է Վաշինգտոն՝ ՆԱՏՕ-ի առաջնորդների գագաթնաժողովին, որը տեղի կունենա հուլիսի 9-11-ը։

«Գագաթնաժողովի շրջանակում նախատեսվում է անցկացնել նաև Էրդողան-Բայդեն հետաձգված հանդիպումը։ Մայիսին հանդիպումը հետաձգվել էր՝ երկու առաջնորդների անհամատեղելի ժամանակացույցի պատճառով»,- գրում է լրատվամիջոցը։

Հիշեցնենք, որ Reuters-ի հետ զրույցում Անկարայում ԱՄՆ դեսպան Ջեֆ Ֆլեյքը հայտարարել էր, որ հուլիսի 9-11-ին Վաշինգտոնում կայանալիք ՆԱՏՕ-ի գագաթնաժողովը կարող է հնարավորություն լինել նախագահ Ջո Բայդենի և նրա թուրք գործընկեր Ռեջեփ Թայիփ Էրդողանի հանդիպման համար։

«Երկու կողմում էլ կա հանդիպման ցանկություն»,- ասել էր Ֆլեյքը՝ նշելով, որ Վաշինգտոնում տրանսատլանտյան դաշինքի գագաթնաժողովը հնարավորություն է տալիս բանակցությունների համար:

Haberturk-ը նաև հայտնում է, որ հուլիսի 20-ին Էրդողանը լինելու է Հյուսիսային Կիպրոսում։

Էմմա Չոբանյան