23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Կանադան Իսլամական հեղափոխության պահապանների կորպուսը ներառել է ահաբեկչական կազմակերպությունների ցուցակում․ Թեհրանը սա թշնամական քայլ է որակել
Քաղաքականություն
20.06.2024 | 13:05
Կանադան Իրանի իսլամական հեղափոխության պահապանների կորպուսը (ԻՀՊԿ) ներառել է ահաբեկչական կազմակերպությունների ցուցակում։ Երկրի կառավարությունը նշում է, որ կան ողջամիտ բավարար հիմքեր՝ ենթադրելու, որ Իսլամական հեղափոխության պահապանների կորպուսը գիտակցաբար իրականացրել, փորձել է իրականացնել, մասնակցել կամ օժանդակել է ահաբեկչական գործողություններին, գրում է Current time-ը։
Հանրային անվտանգության հարցերի նախարար Դոմինիկ Լըբլանը հայտարարել է, որ Կանադան «կօգտագործի իր տրամադրության տակ եղած բոլոր միջոցները՝ Իսլամական հեղափոխության պահապանների կորպուս ահաբեկչական կազմակերպության դեմ պայքարելու համար»։
«Իրանական ռեժիմը հետևողականորեն դրսևորել է մարդու իրավունքների լիակատար անտեսում ինչպես երկրի ներսում, այնպես էլ դրսում, ինչպես նաև պատրաստակամություն է դրսևորել խախտել միջազգային իրավական կարգը։ Մեր կառավարությունը միշտ հանդես է գալու մարդու իրավունքների համար և միջոցներ ձեռնարկելու նրանց դեմ, որոնք փորձում են խախտել մեր ապրելակերպը, ինչպես այստեղ՝ Կանադայում, այնպես էլ ամբողջ աշխարհում»,- ասել է նա։
Այս որոշումից հետո Կանադայի ԱԳ նախարար Մելանի Ժոլին կոչ է արել կանադացիներին լքել Իրանը՝ ձերբակալություների վտանգի պատճառով։
Իրանի ԱԳՆ խոսնակ Նասեր Քանանին դատապարտել է այս քայլը՝ Կանադայի կառավարության որոշումը համարելով թշնամական, որը հակասում է միջազգային իրավունքի չափանիշներին ու սկզբունքներին, փոխանցում է Mehr գործակալությունը։
«Այս անպատասխանատու և սադրիչ քայլը համահունչ է այն սխալ ուղուն, որով Կանադայի կառավարությունն ավելի քան մեկ տասնամյակ գնում է պատերազմ հրահրողների, մարդու իրավունքների իսկական ոտնահարողների և ահաբեկչության հիմնական հիմնադիրների ազդեցության տակ»,- ասել է նա։
Քանանին նշել է, որ Իսլամական հեղափոխության պահապանների կորպուսը պաշտոնական և իրավական հիմք ունի, որը բխում է Իրանի Սահմանադրությունից, և զինված ուժերի այլ ճյուղերի հետ միասին պատասխանատու է երկրի ազգային անվտանգության և սահմանների պաշտպանության համար, ինչպես նաև պայքարում է տարածաշրջանում ահաբեկչության դեմ։
Նա նաև հայտարարել է, որ Թեհրանն իրեն իրավունք է վերապահում համաչափ և փոխադարձ պատասխան տալ միջազգային իրավունքի և Իրանի ժողովրդի ու կառավարության դեմ ուղղված այս գործողությանը։
