21.07.2026 | 23:30
Էլեկտրամատակարարման ընդհատումներ՝ Երևանում ու մարզերում
ԵՄ-ին Վրաստանի միանալու գործընթացը գործնականում դադարեցված է․ ԵՄ դեսպան
Քաղաքականություն
20.06.2024 | 12:00
Վրաստանում Եվրամիության դեսպան Պավել Գերչինսկին հայտարարել է, որ «օտարերկրյա գործակալների մասին» օրենքի ընդունումից հետո ԵՄ-ին Թբիլիսիի անդամակցությանը գործընթացը գործնականում դադարեցվել է։ Եվրոպացի քաղաքական գործիչները շուտով կքննարկեն Վրաստանում ստեղծված իրավիճակին արձագանքները, գրում է «Էխո Կավկազա»-ն։
Դիվանագետի խոսքով՝ Վրաստանի և Եվրամիության հարաբերություններն այժմ գտնվում են «ամենադժվար ժամանակաշրջանում»։
«Այս օրենքի ընդունումը բացասական ազդեցություն ունեցավ և, իմ կարծիքով, սառեցրեց Վրաստանի եվրաինտեգրումը։ Որովհետև, ինչպես գիտեք, Եվրամիությանն ինտեգրվելը պահանջում է միաձայնություն, և դուք բոլորդ արդեն լսել եք մի քանի անդամ երկրների հրապարակային հայտարարությունները, որ նրանք չեն սկսի բանակցություններ Վրաստանի անդամակցության շուրջ, եթե այս օրենքը մնա ուժի մեջ»,- ընդգծել է Գերչինսկին։
Դեսպանն ասել է, որ «անտանելի է տեսնել», թե ինչպես է գործնականում կանգ առել Վրաստանի ինտեգրումը ԵՄ-ին, մինչդեռ Ուկրաինայի և Մոլդովայի հետ կապված գործընթացն առաջ է ընթանում։
Ըստ Գերչինսկիի՝ հաջորդ շաբաթ Լյուքսեմբուրգում ԵՄ ԱԳ նախարարները կքննարկեն օրենքի ընդունման արձագանքը, իսկ մի քանի օր անց՝ անդամ երկրների ղեկավարների մակարդակով։
