Համայնքապետարանի աշխատողն ահազանգում է Նոյեմբերյան համայնքի ղեկավարի կողմից բռնության մասին, համայնքի ղեկավարը՝ հերքում

Սուրեն Անանյան անունով ֆեյսբուքյան օգտատերը, որը, ըստ նրա պրոֆիլում առկա տեղեկատվության, համայնքապետարանի աշխատող է, այսօր տեսանյութ է հրապարակել, որտեղ ահազանգում է Նոյեմբերյան համայնքի ղեկավար Արսեն Աղաբաբյանի կողմից իր նկատմամբ բռնություն գործադրելու մասին։ Օգտատերը, մասնավորապես, նշել է, որ աջակցում է կառավարության կողմից իրականացվող սահմանազատման գործընթացին, որի արդյունքում, ըստ քաղաքացու, «Ապրելու երկիր» կուսակցությունից համայնքի ղեկավար ընտրված Աղաբաբյանի կողմից պարբերաբար ճնշումներ ու սպառնալիքներ է ստանում։

«Արդեն տևական ժամանակ է պահանջում եմ, որպեսզի ինձ ներկայացնեն ներկայաթերթիկ, տան հնարավորություն որպեսզի ստորագրեմ, սակայն համայնքի ղեկավարի գործավարուհին, ներկայացնելով, որ համայքի ղեկավարը արգելել է տրամադրել, հրաժարվեց տրամադրել։ Իրավիճակը արձանագրելու համար սկսում եմ նկարահանել իմ իրավունքները պաշտպանելու նպատակով, այդ ընթացքում իր աշխատասենյակից դուրս է գալիս Նոյեմբերյան համայնքի ղեկավար Արսեն Աղաբաբյանը, հարձակվում իմ վրա, ինձ քաշքշում, իմ դեմ բռնություն գործադրում և խլում իմ հեռախոսը»,- պատմում է Սուրեն Անանյանը։

Նոյեմբերյան համայնքի ղեկավար Արսեն Աղաբաբյանն Factor.am-ի հետ զրույցում հերքեց բռնության և քաշքշուկի մասին Սուրեն Անանյանի պնդումները։

«Մեկնաբանելու բան չկա, գնացել, բողոք է ներկայացրել, իրավապահները կբացահայտեն, տեսնենք ինչ է եղել, ես էլ չգիտեմ՝ էտ ինչի մասին է խոսում», – ասաց Աղաբաբյանը՝ հավելելով, որ ինչ որ բան տեղի է ունեցել, սակայն, ըստ համայնքի ղեկավարի, քաշքշուկ և բռնություն իր կողմից չի եղել։ Անանյանը նաև նշեց, որ դեռևս ոստիկանության բաժին չի հրավիրվել։

Քաղաքացու կողմից ոստիկանություն համապատասխան հաղորդում է ներկայացվել հանցագործության մասին, որը սահմանված կարգով փոխանցվել է ՀՀ քննչական կոմիտե։

Քննչական կոմիտեից Factor.am-ին փոխանցեցին, որ դրա առթիվ այսօր նախաձեռնվել է քրեական վարույթ՝ ՀՀ քրեական օրենսգրքի 460-րդ հոդվածի 2-րդ մասի հատկանիշներով։ Այն ենթադրում է բռնություն գործադրելով կամ բռնություն գործադրելու սպառնալիքով նախատեսված արարք, որը պատժվում է տուգանքով՝ տասնապատիկից երեսնապատիկի չափով, կամ հանրային աշխատանքներով՝ հարյուրից երկու հարյուր ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ մեկից երեք տարի ժամկետով: Ըստ կոմիտեի՝ հանգամանքները կպարզվեն քննությամբ։

Անի Թամրազյան