29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Բաքուն արձագանքել է ՀՀ ԱԳՆ-ի հայտարարությանը՝ նշելով, թե Հայաստանի զինումը վտանգ է ներկայացնում Ադրբեջանի համար
Քաղաքականություն
19.06.2024 | 16:45
Մենք կտրականապես մերժում ենք ՀՀ Արտաքին գործերի նախարարության 2024 թվականի հունիսի 19-ի հայտարարությունը, որն արդարացնում է այդ երկրի զինվելու ջանքերը։ Նման հայտարարությամբ է հանդես եկել Ադրբեջանի ԱԳՆ խոսնակ Այխան Հաջիզադեն՝ արձագանքելով ՀՀ ԱԳՆ-ի՝ այսօր ավելի վաղ արված հայտարարությանը։
Անդրադառնալով ԱԳՆ-ի հայտարարությանը, որ մարտունակ և ժամանակակից զինտեխնիկայով սպառազինված բանակ ունենալը ցանկացած երկրի ինքնիշխան իրավունքն է, Հաջիզադեն ասել է, թե «բոլորին պետք է հայտնի լինի, թե ինչու են Հայաստանի կողմից ձեռնարկվող այս քայլերը ոչ լեգիտիմ և ինչու են վտանգ ներկայացնում Ադրբեջանի համար»։ Ադրբեջանցի պաշտոնյան հայտարարել է, թե «Հայաստանը, որը շուրջ 30 տարի կոպտորեն խախտել է միջազգային իրավունքի նորմերն ու սկզբունքները, ագրեսիա է իրականացրել Ադրբեջանի տարածքային ամբողջականության և ինքնիշխանության դեմ՝ խախտելով Ալմա-Աթայի հռչակագիրը, որին հիմա բազմիցս վկայակոչում է, շարունակում է տարածքային հավակնություններն իր հարևանների նկատմամբ և դադարեցրել է ագրեսիվ գործողությունները միայն Ադրբեջանի քայլերից հետո և դիմում է քաղաքական մանիպուլյացիաների՝ փորձելով ստեղծել խաղաղ երկրի իմիջ»։
Հաջիզադեի հայտարարությամբ Բաքուն, փաստացի, հրաժարվել է հետ վերադարձել Հայաստանի 30 գյուղերի օկուպացված տարածքները։
«Աբսուրդ է, որ ոչ մի սահման չճանաչող Հայաստանը 30 տարի անց ադրբեջանցի զինվորների դիրքերը ներկայացնում է որպես իրենց գյուղերի տարածքներ՝ առանց սահմանազատման, իսկ Ադրբեջանին մեղադրում է օկուպացիայի մեջ։ Հասկանալի է, որ այնպիսի երկրներ, ինչպիսին Ֆրանսիան է, որը, իբր, պահպանում է խաղաղությունը և մրցակցում է Հայաստանին մահաբեր հարձակողական զենքի մատակարարման հարցում՝ ի հեճուկս նրա պաշտպանունակության բարձրացմանն ուղղված հայտարարությունների, ծառայում են Հայաստանը լարվածության և սպառնալիքների նոր օջախի վերածելուն։ Հաշվի առնելով, որ այս քաղաքականությունը նպաստում է հայկական հաջորդ հնարավոր ագրեսիային, կարևոր է ձեռնպահ մնալ այս քայլերից, քանի դեռ ուշ չէ։ Ադրբեջանի և Հայաստանի միջև իրական և տևական խաղաղության համաձայնագրի ստորագրման հիմնական պայմանը Հայաստանի Սահմանադրությունն է, որտեղ հստակ նշվում է Հայաստանի անկախության ակտը՝ կոչ անելով «Հայաստանն ու Լեռնային Ղարաբաղը միավորել» և վերջ տալ հակամարտությանը»,- ասվում է հայտարարության մեջ։
Էմմա Չոբանյան
