30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԵԽ Նախարարների կոմիտեն Թուրքիային կոչ է արել կատարել ՄԻԵԴ-ի վճիռն ու ազատ արձակել իրավապաշտպան Քավալային ու քուրդ գործիչ Դեմիրթաշին
Քաղաքականություն
19.06.2024 | 17:28
Եվրոպայի խորհրդի Նախարարների կոմիտեն անցյալ շաբաթ իր հանդիպումներում կրկին կոչ է արել Թուրքիայի իշխանություններին ազատ արձակել իրավապաշտպան Օսման Քավալային և քուրդ քաղաքական գործիչ Սելահաթթին Դեմիրթաշին, գրում են թուրքական լրատվամիջոցները։
Նշվում է, որ Եվրոպայի խորհրդի օրենսդիր և գործադիր մարմինները կոչ են արել ազատ արձակել քրդամետ Ժողովուրդների դեմոկրատական կուսակցության (HDP) նախկին համանախագահ Սելահաթթին Դեմիրթաշին և գործարար, իրավապաշտպան Օսման Քավալային, որոնք շարունակում են կալանքի տակ մնալ՝ չնայած Մարդու իրավունքների եվրոպական դատարանի (ՄԻԵԴ) որոշումներին։
Թուրքիայի հարցով Եվրոպայի խորհրդի խորհրդարանական վեհաժողովի (ԵԽԽՎ) զեկուցող Ստեֆան Շենաքը հունիսի 11-14-ին Անկարայում և Ստամբուլում անցկացրած իր շփումների ժամանակ կրկնել է Թուրքիային ուղղված իր նախազգուշացումը, որ ՄԻԵԴ որոշումները, հատկապես՝ Դեմիրթաշի և Քավալայի մասով, պետք է կատարվեն։ Նա կոչ է արել թուրքական իշխանություններին անհապաղ ձեռնարկել բոլոր անհրաժեշտ միջոցները՝ Քավալայի և Դեմիրթաշի վերաբերյալ որոշումները կյանքի կոչելու համար։
Շենաքն անցյալ շաբաթ բանակցություններ է վարել թուրք պաշտոնյաների հետ ՄԻԵԴ որոշումների կատարման և Եվրոպայի խորհրդի հետ բարձր մակարդակով երկխոսության շարունակման շուրջ։ Այցի վերաբերյալ իր հայտարարության մեջ նա հայտնել է, որ հնարավորություն է ունեցել բանտում հանդիպել Քավալայի և Դեմիրթաշի հետ։ Ավստրիացի զեկուցողը հայտնել է, որ հանդիպել է Թուրքիայի արտաքին գործերի և արդարադատության նախարարության պաշտոնյաների, ինչպես նաև Սահմանադրական դատարանի անդամների հետ։
Նշենք, որ իրավապաշտպան Օսման Քավալան կալանավորվել է 2017 թվականին Ստամբուլի Գեզի այգու ցույցերը կազմակերպելու մեղադրանքով։ Թուրքական դատարանը նրան արդարացրել էր 2020 թվականի փետրվարին, սակայն 2016-ին ռազմական հեղաշրջման փորձի գործով, լրտեսության և սահմանադրական կարգը խախտելու համար Քավալան կրկին ձերբակալվել է։ Նա աշխարհի տարբեր իրավապաշտպան կազմակերպությունների կողմից համարվում է քաղբանտարկյալ։ Ինքը՝ Քավալան, իրեն առաջադրված մեղադրանքները չի ընդունում՝ դրանք քաղաքական որակելով։
Այս տարվա մայիսին էլ Քոբանիի ցույցերի գործով դատարանը քրդամետ HDP կուսակցության նախկին համանախագահ Սելահաթթին Դեմիրթաշին դատապարտել է ընդհանուր 42 տարվա ազատազրկման։ Այս դատավճռի 20 տարին, իբր, «պետության միասնությունն ու ամբողջականությունը խաթարելու» համար է։ Դեմիրթաշը բանտում է 2016 թվականի նոյեմբերից՝ ահաբեկչության հետ կապված մեղադրանքներով։
Էմմա Չոբանյան
