06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Թուրքիայում անտառային հրդեհների պատճառով Դարդանելի նեղուցը փակ է նավարկության համար
Քաղաքականություն
19.06.2024 | 16:34
Թուրքիայի Տրանսպորտի և ենթակառուցվածքների նախարարությունը հայտարարել է, որ Դարդանելի նեղուցով նավերի երթևեկությունը ժամանակավորապես դադարեցվել է մեկ ուղղությամբ՝ հյուսիս-հարավ։ Պատճառն անտառային հրդեհներն են, գրում են թուրքական լրատվամիջոցները։
Պատմական Գալիպոլի թերակղզում գտնվող Չանաքքալե նահանգի Էջեաբաթում հուլիսի 18-ի կեսօրից բռնկված հրդեհը չի հաջողվում մարել ուժեղ քամու պատճառով։
Գյուղատնտեսության և անտառային տնտեսության նախարար Իբրահիմ Յումաքլըն էլ հայտարարել է, որ շրջակա երկու գյուղերը, որպես կանխարգելիչ միջոց, տարհանվել են, 530 մարդ տեղավորվել է նախարարությունների հյուրատներում։
Հունիսի 19-ի առավոտյան տվյալներով՝ հրդեհից տուժել է ավելի քան 575 հա հողատարածք։
Հաղորդվում է, որ նահանգում հրդեհը բռնկվել է գյուղատնտեսական հողերում, որտեղ այրվում են բերքի մնացորդները, ինչը տարածված, սակայն վտանգավոր պրակտիկա է Թուրքիայում։ Էգեյան ծովի տարածաշրջանի Ուշաք և Դենիզլի նահանգներում անտառային հրդեհները հունիսի 19-ի դրությամբ նույնպես շարունակվում են։ Հունիսի 18-ին Իզմիրում բռնկված հրդեհը հաջողվել է մեկուսացնել։
Անցյալ տարի Թուրքիան ամառվա ընթացքում տուժել էր բազմաթիվ անտառային հրդեհներից, հատկապես բարձր ջերմաստիճանի և չափից ավելի երաշտի պատճառով: Հրդեհներից առավել տուժած տարածքներից մեկը հենց Դարդանելի նեղուցի շրջակայքն էր։
