11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Պուտինը Կիմ Չեն Ընին հայտարարել է երկու երկրների հարաբերություններում նոր հիմնարար փաստաթղթի պատրաստման մասին
Քաղաքականություն
19.06.2024 | 12:27
Ռուսաստանը և Հյուսիսային Կորեան պատրաստել են նոր հիմնարար փաստաթուղթ, որը երկար տարիներ երկու երկրների հարաբերությունների հիմքում կլինի։ Այս մասին հայտարարել է ՌԴ նախագահ Վլադիմիր Պուտինը Փհենյանում՝ Հյուսիսային Կորեայի առաջնորդ Կիմ Չեն Ընի հետ բանակցությունների մեկնարկին, գրում է ՌԲԿ-ն։
«Անցյալ տարի Ռուսաստան կատարած ձեր այցի արդյունքում մենք զգալի առաջընթաց գրանցեցինք մեր միջպետական կապերի կառուցման գործում։ Այսօր պատրաստվել է նոր հիմնարար փաստաթուղթ, որը երկարաժամկետ հեռանկարում մեր հարաբերությունների հիմքը կհանդիսանա»,- ասել է Պուտինը։
Երկու երկրների հարաբերությունների զարգացման հիմքը նա անվանել է «նախորդների սխրանքները»։ Պուտինը խոսել է խորհրդային զինվորների մասին, որոնք 1945 թվականին կորեացիների կողքին կռվել են Ճապոնիայից ազատագրվելու համար։
Կիմ Չեն Ընն իր հերթին նշել է, որ Փհենյանի և Մոսկվայի հարաբերությունները մտնում են «նոր բարձր բարգավաճման շրջան»։ Նա նշել է Ռուսաստանի դերը աշխարհում ռազմավարական կայունության և հավասարակշռության պահպանման գործում և հայտարարել Ուկրաինայի հակամարտությունում Մոսկվային աջակցության մասին։
«Հիմա աշխարհում իրավիճակն ավելի է բարդանում և արագ փոխվում։ Նման իրավիճակում մենք մտադիր ենք է՛լ ավելի ամրապնդել ռազմավարական հաղորդակցությունը Ռուսաստանի հետ»,- ասել է Հյուսիսային Կորեայի առաջնորդը։
Նշենք, որ Պուտինը Հյուսիսային Կորեա է ժամանել նախօրեին։ Սա նրա առաջին այցն է երկիր 2000 թվականից ի վեր, երբ այն ղեկավարում էր երկրի ներկայիս ղեկավարի հայրը՝ Կիմ Չեն Իրը։ Վերջին անգամ Կիմ Չեն Ընը ՌԴ էր այցելել անցյալ տարվա սեպտեմբերին։
