23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
ՌԴ-ն պատրաստ չէ Ուկրաինայում խաղաղության հարցով լուրջ քննարկումների. Պետքարտուղարություն
Քաղաքականություն
18.06.2024 | 13:26
ԱՄՆ-ը կրկին մերժել է Ռուսաստանի նախագահ Վլադիմիր Պուտինի՝ Ուկրաինայի հարցով խաղաղ բանակցություններ սկսելու պայմանները՝ ասելով, որ Մոսկվան «պատրաստ չէ լուրջ, բարեխիղճ քննարկումների», գրում է VOA-ն։
Պետքարտուղարության խոսնակ Մեթյու Միլլերն ասել է, որ Պուտինը «նախքան բանակցությունները սկսելը մաքսիմալիստական ևս մեկ հայտարարություն է արել՝ կոչ անելով Ուկրաինային հանձնել ավելի շատ ինքնիշխան տարածք, քան Ռուսաստանը մինչ այժմ օկուպացրել է»:
«Նախագահ Պուտինը պահանջել է, որ Ուկրաինան համաձայնի զինաթափմանը, որպեսզի այն խոցելի լինի Ռուսաստանի ապագա ագրեսիայի համար»,- ասել է Միլլերը։
Նա հայտարարել է, որ «ոչ մի պատասխանատու երկիր չի կարող ասել, որ դա խաղաղության ողջամիտ հիմք է»։
«Սա հակասում է ՄԱԿ-ի կանոնադրությանը։ Սա հակասում է բարոյականության հիմունքներին: Սա հակասում է հիմնական ողջախոհությանը։ Հասկանալի է, որ Ռուսաստանը պատրաստ չէ լուրջ, բարեխիղճ քննարկումների։ Ռուսաստանի գործողությունները դա հատկապես պարզ են դարձնում, քանի որ նա շարունակում է ռմբակոծել Ուկրաինայի կարևոր ենթակառուցվածքները, սպառնալ նավագնացությանը Սև ծովում և բռնի կերպով արտաքսել տասնյակ հազարավոր ուկրաինացի երեխաների»,- ասել է Միլլերը:
Ըստ ամերիկացի պաշտոնյայի՝ Միացյալ Նահանգները կշարունակի Ուկրաինային ցուցաբերել անսասան աջակցություն։ Նա հիշեցրել է, որ անցյալ շաբաթ ԱՄՆ նախագահ Ջո Բայդենը և Ուկրաինայի նախագահ Վլադիմիր Զելենսկին ստորագրել են անվտանգության երկկողմ համաձայնագիր։
«Սա կարևոր հանգրվան է մեր ձգտման մեջ՝ կառուցելու երկրների լայն, փոխադարձաբար ամրապնդվող և հզոր ցանց՝ ապահովելու Ուկրաինայի ապագան և աջակցելու նրա եվրաատլանտյան ինտեգրմանը, ներառյալ՝ ՆԱՏՕ-ի հետ փոխգործակցությունը»,- ասել է Միլլերը:
Այս համաձայնագրում, ըստ նրա, ԱՄՆ-ը և Ուկրաինան հայտարարել են անվտանգության և տնտեսության ոլորտում համագործակցությունը զարգացնելու, կոռուպցիայի դեմ պայքարին նպաստելու և Ռուսաստանին պատասխանատվության ենթարկելու մտադրության մասին։
