14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ամերիկացի լրագրող Էվան Գերշկովիչի դատավարությունը ՌԴ-ում կանցկացվի դռնփակ
Քաղաքականություն
17.06.2024 | 16:40
ՌԴ Սվերդլովսկի շրջանային դատարանը հայտնել է, որ The Wall Street Journal-ի լրագրող Էվան Գերշկովիչի գործը, որը մեղադրվում է լրտեսության մեջ (ՌԴ Քրեական օրենսգրքի 276-րդ հոդված), կքննվի դռնփակ, փոխանցում է Current Time-ը։
Լրագրողի դատավարությունը կսկսվի հունիսի 26-ին։ Ավելի վաղ ՌԴ գլխավոր դատախազությունը հաստատել էր լրագրողի քրեական գործով մեղադրական եզրակացությունը։ Նախաքննությունը վարել է ԱԴԾ քննչական վարչությունը։
Ըստ քննիչների՝ 2023 թվականի մարտին Գերշկովիչը «ԿՀՎ-ի ցուցումով», իբր, Սվերդլովսկի մարզում գաղտնի տեղեկատվություն է հավաքել ռազմական տեխնիկայի արտադրության և վերանորոգման համար «Ուրալվագոնզավոդ» ձեռնարկության գործունեության մասին։
«Գերշկովիչն անօրինական գործողություններ է իրականացրել՝ պահպանելով հույժ գաղտնիության միջոցներ»,- պնդում են գերատեսչությունում։
Հիշեցնենք, որ Էվան Գերշկովիչը Եկատերինբուրգում ձերբակալվել էր անցյալ տարվա մարտի 30-ին։ Լրտեսության մասին հոդվածով նրան սպառնում է 12-ից 20 տարվա ազատազրկում։ ՌԴ նախագահ Վլադիմիր Պուտինը դեկտեմբերին կայացած մամուլի ասուլիսի ժամանակ չէր բացառել Գերշկովիչի փոխանակումը։
ԱՄՆ ղեկավարությունը և The Wall Street Journal-ը կտրականապես հերքում են մեղադրանքները և հայտարարում լրագրողի անմեղության մասին՝ կոչ անելով անհապաղ ազատ արձակել նրան։
