Հյուսիսային Կորեան ՌԴ-ին ավելի քան մեկ տարվա արկերի պաշար է մատակարարել

Հյուսիսային Կորեան առնվազն 10,000 կոնտեյներ է ուղարկել Ռուսաստան, որոնք կարող են պարունակել մինչև 4,8 միլիոն հրետանային արկ, որոնք նա կօգտագործի Ուկրաինայի դեմ պատերազմում: Bloomberg-ին այս մասին ասել է Հարավային Կորեայի պաշտպանության նախարար Շին Վոն Սիկը։

Ի պատասխան՝ Մոսկվան սկսել է Փհենյանին մատակարարել տանկեր, ինքնաթիռներ և տեխնոլոգիա՝ լրտեսական արբանյակային ծրագրի իրականացման համար, առաջիկայում էլ ՌԴ նախագահ Վլադիմիր Պուտինը կմեկնի Փհենյան՝ բանակցություններ վարելու իր նոր ընկերոջ՝ Կիմ Չեն Ընի հետ։

«Ակնկալվում է, որ Պուտինը կձգտի ավելի սերտ համագործակցություն անվտանգության ոլորտում Հյուսիսային Կորեայի հետ, հատկապես ռազմական մատակարարումների առումով, ինչպիսիք են հրետանային արկերը, որոնք անհրաժեշտ են [պատերազմում] հաղթելու հնարավորությունից օգտվելու համար»,- ասել է Շինը:

Հարավկորեացի նախարարի խոսքով՝ Հյուսիսային Կորեան նաև տասնյակ բալիստիկ հրթիռներ է ուղարկել Ռուսաստան։ Ուկրաինացի փորձագետներն արդեն ներկայացրել են ռուսական բանակի կողմից դրանց օգտագործման ապացույցները՝ նշելով, որ դրանց մոտ կեսը չի աշխատել:

Հարավային Կորեայի և արևմտյան հետախուզության աշխատակիցների ու փորձագետների կարծիքով՝ Փհենյանը սկսել է Ռուսաստանին հրթիռներ մատակարարել անցյալ տարվա օգոստոսի վերջին և ավելացրել է մատակարարումները սեպտեմբերի կեսերին Ամուրի մարզի «Վոստոչնի» տիեզերակայանում Կիմ Չեն Ընի և Պուտինի հանդիպումից հետո:

Ըստ հրապարակման՝ եթե Շին Վոն-Սիկի գնահատականը ճիշտ է, ապա այս ընթացքում Ռուսաստանն իր նոր դաշնակցից ստացել է ավելին, քան ի վիճակի է արտադրել մեկ տարվա ընթացքում։