Զելենսկին հայտնել է Սի Ցզինպինի՝ Ռուսաստանին զենք չմատակարարելու խոստման մասին

Սի Ցզինպինը Վլադիմիր Զելենսկիին խոստացել է, որ Չինաստանը Ռուսաստանին զենք չի տրամադրի Ուկրաինայի դեմ պատերազմի համար, ասել է Ուկրաինայի նախագահը Սպիտակ տան ղեկավար Ջո Բայդենի հետ համատեղ մամուլի ասուլիսի ժամանակ՝ ԱՄՆ-ի և Ուկրաինայի միջև անվտանգության երկկողմ համաձայնագրի ստորագրումից հետո, փոխանցում է The Moscow Times-ը։

«Ես հեռախոսազրույց եմ ունեցել Չինաստանի ղեկավարի հետ։ Նա ասել է, որ Ռուսաստանին զենք չի մատակարարի։ Տեսնենք։ Եթե նա պարկեշտ մարդ է, չի անի, որովհետև ինձ խոսացել է»,- ասել է Զելենսկին։

Ուկրաինայի նախագահը Կիևի և Վաշինգտոնի միջև անվտանգության համաձայնագրի ստորագրման օրն «իսկապես պատմական» է անվանել։

«Մենք ստորագրել ենք ամենաուժեղ համաձայնագիրը Ուկրաինայի և ԱՄՆ-ի միջև մեր անկախությունից ի վեր։ Սա համաձայնագիր է անվտանգության և, հետևաբար, մարդկային կյանքի պաշտպանության մասին։ Սա համաձայնագիր է համագործակցության և, հետևաբար, մեր երկրների հզորացման համար։ Սա կայուն խաղաղություն ապահովելու քայլերի վերաբերյալ համաձայնագիր է և, հետևաբար, այն օգտակար է աշխարհում բոլորի համար»,- ընդգծել է նա՝ հավելելով, որ ստորագրված փաստաթուղթը ձեռնտու է բոլորին, քանի որ Ռուսաստանը «իրական գլոբալ վտանգ է ներկայացնում»։

Ջո Բայդենն իր հերթին հայտարարել է, որ Ռուսաստանի ներխուժումն Ուկրաինա «փորձություն է աշխարհի համար»։ Միաժամանակ, նա խոստացել է, որ ԱՄՆ-ը և արևմտյան երկրները կշարունակեն աջակցել Կիևին։

«Մենք կաջակցե՞նք Ուկրաինային։ Մենք հանդես կգա՞նք ինքնիշխանության, ազատության և բռնապետության դեմ: Միացյալ Նահանգները, G7-ը և աշխարհի երկրները հետևողականորեն պատասխանել են այս հարցին՝ ասելով. «Այո՛, մենք դա կանենք»: Մենք կկանգնենք Ուկրաինայի կողքին»,- ասել է պետության ղեկավարը։

Հունիսի 13-ին Բայդենն ու Զելենսկին Իտալիայում G7-ի գագաթնաժողովի շրջանակում 10-ամյա երկկողմ անվտանգության համաձայնագիր են ստորագրել։ Փաստաթուղթն ուղղված է ուժեղացնելու Ուկրաինայի պաշտպանությունը ռուսական ագրեսիայի դեմ և նախատեսվում է դառնալ ՆԱՏՕ-ին Ուկրաինայի անդամակցության հաջորդ քայլը։