Քաղաքականություն
13.06.2024 | 17:33
Վրաստանի զինված ուժերը Թուրքիայի հետ համաձայնագրի շրջանակում ստացել են ՆԱՏՕ-ի չափանիշներին համապատասխան կառուցված VURAN նոր զրահափոխադրիչներ։ Այս մասին հայտնել է Վրաստանի Պաշտպանության նախարարությունը, փոխանցում է civil.ge-ն։
Հանձնման պաշտոնական արարողությունը տեղի է ունեցել Վազիանիի 4-րդ հետևակային բրիգադի ուսումնական հրապարակում, որին մասնակցել են նաև Վրաստանի պաշտպանության փոխնախարար Սերգո Ջանելիձեն և Թբիլիսիում Թուրքիայի դեսպան Ալի Քաան Օրբայը։
Վրաստանի ՊՆ-ի համաձայն՝ ակնկալվում է, որ VURAN զրահամեքենաները՝ հագեցած առաջադեմ ենթահամակարգերով, զգալիորեն բարձրացնելու են երկրի պաշտպանունակությունը և խթանելու են երկու երկրների միջև ռազմական համագործակցության սերտացումը:
«Վրաստանն ու Թուրքիան երկար ու հաջող համագործակցություն ունեն պաշտպանության ոլորտում, և այսօր դրա վառ օրինակն է։ Նման միջոցառումները շատ կարևոր են Վրաստանի համար, քանի որ դրանք ամրապնդում են մեր երկրի պաշտպանունակությունը և զինված ուժերն ավելի են մոտեցնում ՆԱՏՕ-ի չափանիշներին»,- ասել է Ջանելիձեն։
Թուրքիայի դեսպանն էլ ասել է, որ այս մատակարարումը «Վրաստանի անվտանգությանը, անկախությանը և տարածքային ամբողջականությանն Անկարայի անսասան աջակցության շոշափելի դրսևորումն է»։
