Թուրքիայում ԱՄՆ դեսպանը հայտարարել է, որ Բայդենն ու Էրդողանը կարող են հանդիպել ՆԱՏՕ-ի հուլիսյան գագաթնաժողովում

Անկարայում ԱՄՆ դեսպան Ջեֆ Ֆլեյքը հայտարարել է, որ հուլիսի 9-11-ին Վաշինգտոնում կայանալիք ՆԱՏՕ-ի գագաթնաժողովը կարող է հնարավորություն լինել նախագահ Ջո Բայդենի և նրա թուրք գործընկեր Ռեջեփ Թայիփ Էրդողանի հանդիպման համար, գրում է Al Monitor-ը։

Էրդողանի առաջին այցը Սպիտակ տուն, որն ի սկզբանե նախատեսված էր մայիսին, թուրքական կողմը հետաձգել էր, երկու կողմերի պաշտոնյաները խոսում էին պլանավորման հակասություններից։ Սակայն ենթադրվում է, որ Միացյալ Նահանգների շարունակական ռազմական աջակցությունն Իսրայելին Գազայի դեմ պատերազմում թուրքական կողմի հետաձգման որոշման գլխավոր գործոններից մեկն է:

Ջո Բայդենն ԱՄՆ առաջին նախագահն է ավելի քան երկու տասնամյակների ընթացքում, որը չի հյուրընկալել Էրդողանին Սպիտակ տանը պաշտոնավարման առաջին երեք տարիների ընթացքում։

«Երկու կողմերում էլ կա հանդիպման ցանկություն»,- ասել է Ֆլեյքը Reuters-ի հետ հարցազրույցում՝ նշելով, որ Վաշինգտոնում տրանսատլանտյան դաշինքի գագաթնաժողովը հնարավորություն է տալիս բանակցությունների համար:

Կրկնելով, որ հետաձգումը պայմանավորված է աշխատանքային գրաֆիկների անհամապատասխանությամբ, դեսպանը նաև խոստովանել է, որ այցի պլանավորումը տեղի է ունեցել ԱՄՆ-Թուրքիա հարաբերությունների համար դժվար ժամանակներում՝ Իսրայել-ՀԱՄԱՍ պատերազմի «քաղաքական ծանր ֆոնի» պայմաններում:

ՆԱՏՕ-ի ղեկավարները հավաքվելու են Վաշինգտոնում՝ նշելու դաշինքի 75-ամյակը: Թուրք պաշտոնյաները հայտնել են, որ Էրդողանը մասնակցելու է հանդիպմանը:

ԱՄՆ դեսպանն անդրադարձել է նաև ԲՐԻԿՍ-ին միանալու Անկարայի ցանկությանը՝ հույս հայտնելով, որ Թուրքիան չի միանա կառույցին, սակայն հավելել է, որ ՆԱՏՕ-ի անդամի մասնակցությունը կազմակերպությանը չի խանգարի Արևմուտքի հետ նրա դաշնակցությանը։