21.07.2026 | 23:30
Էլեկտրամատակարարման ընդհատումներ՝ Երևանում ու մարզերում
Ուկրաինան Դանիայից առաջին F-16 ինքնաթիռները կստանա այս ամառ
Քաղաքականություն
12.06.2024 | 21:38
Նիդերլանդների պաշտպանության նախարար Կաիսա Օլոնգրենը հայտնել է, որ Ուկրաինան այս ամառ կստանա իր արևմտյան դաշնակիցներից առաջին F-16 կործանիչները, փոխանցում է BBC-ի ռուսական ծառայությունը։
«Դրանից հետո մատակարարումները հունի մեջ կդրվեն։ Կլինեն ավելի ու ավելի շատ ինքնաթիռներ, և դա կփոխի ձեր ռազմաօդային ուժերը»,- ասել է Օլոնգրենը:
Նա հավելել է, որ նախ Ուկրաինա կործանիչներ կուղարկի Դանիան, հետո՝ Նիդերլանդները, սակայն «դա համատեղ աշխատանք է»։ Օլոնգրենը նշել է, որ չի կարող նշել ինքնաթիռի առաքման ճշգրիտ ամսաթիվը։
Մայիսին Բելգիայի արտգործնախարար Այա Լաբիբը հայտարարել է, որ այդ երկրից առաջին F-16-ները պետք է Ուկրաինա հասնեն մինչև տարեվերջ։
Բելգիան, Դանիան, Նիդերլանդները և Նորվեգիան խոստացել են Ուկրաինային փոխանցել մոտ 60 միավոր F-16 կործանիչ։ Ըստ արևմտյան լրատվամիջոցների՝ ուկրաինական զինված ուժերը դրանք կընդունեն մի քանի խմբաքանակով երկար ժամանակ և չեն կարողանա բոլոր ինքնաթիռներն անմիջապես ներդնել մարտական գործողություններում, քանի որ օդաչուների պատրաստությունն ավելի դանդաղ է ընթանում, քան Կիևը կցանկանար։
