Քաղաքականություն
12.06.2024 | 16:04
Ադրբեջանի ԱԳՆ-ն հայտարարություն է տարածել՝ «մտահոգություն հայտնելով Ֆրանսիայի ոստիկանության կողմից ցուցարարների նկատմամբ կիրառած միջոցների կապակցությամբ»։
«Մենք մտահոգված ենք Ֆրանսիայի որոշ քաղաքներում ցուցարարների նկատմամբ ոստիկանության բռնության և արցունքաբեր գազի կիրառման կապակցությամբ: Անընդունելի է խաղաղ ցուցարարների նկատմամբ ուժի չափից ավելի կիրառումը, որոնք օգտագործում են իրենց կարծիքի և արտահայտման ազատության իրավունքը: Մենք կոչ ենք անում Ֆրանսիայի կառավարությանը՝ շտապ ապաէսկալացնել իրավիճակը»,- ասվում է հայտարարության մեջ։
Հակաֆրանսիական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբը, որը Փարիզի դեմ տարբեր միջոցառումներ է անցկացնում։ Բաքուն սկսել է ակտիվորեն ֆինանսավորել Ֆրանսիայի և Կորսիկայի անդրծովյան տարածքների որոշ ներկայացուցիչների։ Ապրիլին էլ Ադրբեջանի Միլլի Մեջլիսի և Խաղաղ օվկիանոսում գտնվող ֆրանսիական Նոր Կալեդոնիայի Կոնգրեսի միջև ստորագրվել էր համագործակցության հուշագիր։
Ֆրանսիայի ներքին գործերի նախարարն իր հերթին Բաքվին մեղադրել է վերջերս Նոր Կալեդոնիայում տեղի ունեցած անկարգություններին մասնակցության մեջ։
Էմմա Չոբանյան
