Պուտինը հուլիսին Աստանայում Էրդողանի հետ հանդիպման հույս է հայտնել

ՌԴ նախագահ Վլադիմիր Պուտինը հույս ունի հուլիսին Աստանայում հանդիպել Թուրքիայի նախագահ Ռեջեփ Թայիփ Էրդողանին։ Այս մասին նա ասել է Կրեմլում Թուրքիայի ԱԳ նախարար Հաքան Ֆիդանի հետ հանդիպմանը, գրում է ՏԱՍՍ-ը։

«Ես կխնդրեի ձեզ փոխանցել իմ լավագույն բարեմաղթանքները նախագահ Էրդողանին։ Հուսով եմ, որ առաջիկայում՝ հուլիսի 3-4-ին, նա կլինի Աստանայում, ինչքան ինձ հայտնի է՝ միջազգային միջոցառման շրջանակում։ Մենք հնարավորություն կունենանք հանդիպել նրա հետ և քննարկել բոլոր ընթացիկ հարցերը»,- ասել է Պուտինը։

Հուլիսի 3-4-ն Աստանայում նախանշված է Շանհայի համագործակցության կազմակերպության գագաթնաժողովը։

Նշվում է, որ Պուտինը գոհունակությամբ է խոսել Թուրքիայի հետ հարաբերությունների զարգացման մասին։

«Այս ամենը տեղի է ունենում, իհարկե, մեր ընկերոջ՝ Թուրքիայի նախագահի գլխավորությամբ և անմիջական աջակցությամբ»,- նշել է նա՝ հավելելով, որ չնայած 2023 թվականի աճին՝ 2024-ի սկզբին «առևտրաշրջանառության մակարդակի որոշակի անկում է նկատվել»։ Պուտինը դա կապել է ապրանքների գների ճշգրտման հետ և հույս հայտնել, որ իրավիճակը շուտով կբարելավվի:

Թուրքական «Անադոլու» գործակալության հաղորդմամբ էլ՝ Ֆիդանն ասել է, որ Թուրքիայի և Ռուսաստանի հարաբերությունները զարգանում են չափազանց հաջող կերպով։ Նա, միաժամանակ, նշել է, որ կան քայլեր, որոնք երկու երկրները պետք է ձեռնարկեն առևտրի ոլորտում։

Ֆիդանն ընդգծել է Անկարայի հաստատակամ մտադրությունը՝ շարունակելու համապարփակ միջնորդական գործունեությունը ուկրաինական ճգնաժամի կարգավորման համար։ Նա նաև հավելել է, որ «մի քանի թեմաներ կան, որոնք կցանկանար բարձրաձայնել» Վլադիմիր Պուտինի հետ հանդիպման ժամանակ։

Թուրքիայի ԱԳ նախարարը ՌԴ-ում էր՝ մասնակցելու ԲՐԻԿՍ-ի երկրների ԱԳ նախարարի հանդիպմանը։ Այցի շրջանակում նա հանդիպել է նաև ՌԴ ԱԳ նախարար Սերգեյ Լավրովի, այլ պաշտոնյաների հետ։

Էմմա Չոբանյան