Շոլցը կոչ է արել ուժեղացնել Ուկրաինայի հակաօդային պաշտպանությունը

Բեռլինում անցկացվող Ուկրաինայի վերակառուցմանը նվիրված միջազգային համաժողովում Գերմանիայի կանցլեր Օլաֆ Շոլցը կոչ է արել է՛լ ավելի ուժեղացնել Կիևի հակաօդային պաշտպանությունը, որը դարձել է ռուսական ռազմական ագրեսիայի թիրախ, գրում է DW-ի ռուսական ծառայությունը։

Նա դաշնակիցներին հորդորել է աջակցել գերմանական հակաօդային պաշտպանության նախաձեռնությանը «հնարավոր ամեն ինչով»։

Միաժամանակ, Շոլցմ Ուկրաինային խոստացել է լայնածավալ ու երկարաժամկետ օգնություն՝ երկիրը վերականգնելու համար։ Նրա խոսքով՝ այդ հարցը կբարձրացնի նաև Իտալիայում G7-ի գագաթնաժողովում, որը բացվում է հունիսի 13-ին։ Գերմանիայի կանցլերը նշել է Համաշխարհային բանկի տվյալները, որոնց համաձայն՝ առաջիկա 10 տարում Ուկրաինային կպահանջվի մոտ 500 միլիարդ դոլար՝ վերակառուցման համար։

Շոլցը բիզնեսի ներկայացուցիչներին կոչ է արել ներգրավվել այս գործընթացում և ներդրումներ կատարել Ուկրաինայում։

«Հաշվի առնելով այն մասշտաբները, որոնց մասին մենք խոսում ենք, մասնավոր կապիտալի մասնակցությունն անհրաժեշտ է»,- ասել է Գերմանիայի կառավարության ղեկավարը՝ նշելով, որ Գերմանիայից հարյուրավոր ընկերություններ շարունակում են գործել Ուկրաինայում, իսկ միայն ավտոմոբիլային ոլորտում այնտեղ աշխատում է 35 հազար մարդ։

Ըստ նրա՝ չնայած շարունակվող պատերազմին՝ Ուկրաինայից գերմանական ներդրումների արտահոսք չկա, երկու երկրների առևտրի ծավալները նույնիսկ զգալիորեն աճել են նախապատերազմյան շրջանի համեմատությամբ։

Իր հերթին, Ուկրաինայի նախագահ Վլադիմիր Զելենսկին, ելույթ ունենալով համաժողովում, նշել է, որ Կիևին անհրաժեշտ են առնվազն յոթ Patriot հակաօդային պաշտպանության համակարգեր՝ երկիրը ռուսական հարձակումներից պաշտպանելու համար։

«ՀՕՊ-ը բոլոր հարցերի պատասխանն է»,- ասել է նա։

Զելենսկին նաև շնորհակալություն է հայտնել Գերմանիային երեք Patriot համակարգեր տրամադրելու համար ու հորդորել Ռուսաստանին զրկել Ուկրաինայի վրա հարձակումները շարունակելու հնարավորությունից։ Նա ընդգծել է, որ Ռուսաստանի նպատակն առաջին հերթին Ուկրաինայի էներգամատակարարումը ոչնչացնելն է։