ՌԴ-ն և Իրանը կասեցրել են ռազմավարական համագործակցության համաձայնագրի մշակումը

Մոսկվան և Թեհրանը ժամանակավորապես դադարեցրել են ռազմավարական համագործակցության համաձայնագրի մշակումը՝ իրանական կողմի խնդիրների պատճառով, ՌԻԱ Նովոստիին տված հարցազրույցում ասել է ՌԴ ԱԳՆ ասիական երկրորդ վարչության տնօրեն Զամիր Քաբուլովը։

«Այն [Մոսկվայի և Թեհրանի միջև համապարփակ համագործակցության մասին նոր համաձայնագրի ստորագրման որոշումը] երբեք չի կորցրել իր ուժը և կապված չէ վերջին իրադարձությունների հետ [Իրանի նախագահ Էբրահիմ Ռաիսիի մահվան]»,- պարզաբանել է Քաբուլովը։

Դիվանագետը հավելել է, որ Ռուսաստանի և Իրանի միջև համապարփակ համագործակցության համաձայնագրի կնքումը ռազմավարական որոշում է երկու երկրների ղեկավարության կողմից։

«Կասկած չկա, որ այս աշխատանքը կավարտվի մինչև համաձայնագրի տեքստի համաձայնեցումը, իսկ հետո երկու երկրների ղեկավարները կորոշեն ստորագրման ժամանակն ու վայրը»,- ասել է նա։

Մոսկվայի և Թեհրանի հարաբերությունները կառուցվում են 2001 թվականին ստորագրված «Հարաբերությունների հիմունքների և համագործակցության սկզբունքների մասին» համաձայնագրի հիման վրա (փաստաթուղթը թարմացվում է հինգ տարին մեկ անգամ)։ Սակայն վերջին տարիներին կողմերը փոխադարձաբար եկել են այն եզրակացության, որ փաստաթուղթը չի համապատասխանում աշխարհաքաղաքական իրավիճակի նոր իրողություններին և փոխգործակցության ավելի բարձր մակարդակին։

Նոր պայմանագրի ստեղծմանն ուղղված ակտիվ աշխատանքն սկսվել է 2022 թվականի սկզբին՝ ՌԴ Ռաիսիի այցից հետո։ Երկու տարի անց նախագիծը «պատրաստվածության բարձր աստիճանի էր», բացատրում է Քաբուլովը։

«Բայց հետո իրանցի գործընկերները մի քանի ուղղումներ արեցին, որոնք պահանջում էին նոր միջգերատեսչական հաստատում այստեղ՝ Ռուսաստանում»,- հավելել է նա:

Համաձայնագրի կնքման մոտավոր ժամկետներն անհայտ են:

Հունիսի 5-ին ՌԴ նախագահ Վլադիմիր Պուտինը հայտարարել էր, որ Ռուսաստանի և Իրանի հարաբերությունները շատ ոլորտներում լավ են զարգանում։

«Մենք ունենք համատեղ աշխատանքի մի ամբողջ ծրագիր, զարգացնում ենք առևտրատնտեսական կապերը։ Իհարկե, մենք շատ կցանկանայինք լրացուցիչ ջանքեր գործադրել բարձր տեխնոլոգիաների ոլորտում զարգացման ուղղությամբ»,- ասել է նա համաշխարհային լրատվական գործակալությունների ղեկավարների հետ հանդիպման ժամանակ։

Միևնույն ժամանակ, պետության ղեկավարն ընդգծել էր, որ «բոլոր սահմանափակումները» հաշվի առնելով՝ դա «այնքան էլ հեշտ չէ անել, բայց հնարավոր է»։