Ինչպե՞ս կարելի է առանց ճշտելու նման բան գրել․ Արարատ Զուրաբյանն՝ ավագանու ընտրություններին չառաջադրվելու մասին

ՀՀՇ վարչության նախագահ, «Ծառուկյան» դաշինքի պատգամավոր Արարատ Զուրաբյանը հերքում է տեղեկությունը, որ ինքը չի առաջադրվել Երևանի ավագանու ընտրություններին։

«Զարմանում եմ՝ ինչպե՞ս կարելի է առանց ճշտելու նման բան գրել։ Իմ ներկայացուցիչը երեկ եղել է Կենտրոնական ընտրական հանձնաժողովում։ Ստեղծվել է «Երևանցիներ» դաշինքը, որի կազմի մեջ են մտնում «Հայոց համազգային շարժում» և «Հայոց Հայրենիք» կուսակցությունները, և մենք պատրաստվում ենք ակտիվորեն  մասնակցել ավագանու ընտրություներին»,- Factor.am-ի հետ զրույցում ասաց Արարատ Զուրաբանը՝ նշելով որ ավագանու ընտրություններին մասնակցող իրենց դաշինքը շուտով կհայտարարի նաև իր կարգախոսը։ 

«Երևանցիներ» կուսակցությունների դաշինքի առաջին հորիզոնականում Արարատ Զուրաբյանն է, 2-րդ ում՝ Դավիթ Առաքելյանը, եռյակը եզրափակում է Գագիկ Գյանջումյանը։ 

Դաշինքն ընտրություններին կմասնակցի 53 հոգանոց ընտրացուցակով։ 

Հիշեցնենք, որ այսօր «Ժամանակ» թերթը գրել է, որ ՀՀՇ վարչության նախագահ  Արարատ Զուրաբյանը, որը նախկինում հայտարարում էր, որ առաջադրվելու է քաղաքապետի թեկնածու, այդպես էլ չառաջադրվեց՝ հավանաբար, ավելի իրատեսորեն գնահատելով իր հնարավորությունները: 

Ըստ թերթի՝ Զուրաբյանը բողոքել է, որ նախկինում ինքը ԲՀԿ նախագահ Գագիկ Ծառուկյանի հետ պայմանավորվածություն է ունեցել, որ ԲՀԿ-ականներն ազատ են լինելու որոշել, թե ում թեկնածությունը պաշտպանեն, ում օգնեն՝ իրե՞ն, թե՞ ԲՀԿ պաշտոնական թեկնածու Նաիրա Զոհրաբյանին, սակայն ի վերջո հասկացել է, որ ԲՀԿ ամբողջ ռեսուրսն աշխատելու է Զոհրաբյանի համար, իսկ այդ պայմաններում ինքը խայտառակ արդյունք է արձանագրելու, ինչից խուսափելու լավագույն ձևը չառաջադրվելն էր:

Աղավնի Սուքիասյան