Քաղաքականություն
07.06.2024 | 16:56
Արևմուտքը ճնշում է գործադրում Թուրքիայի վրա, ու թեև Մոսկվայի և Անկարայի տնտեսական փոխգործակցության մեջ կան խնդիրներ, երկու երկրներն էլ ելքեր են փնտրում ստեղծված իրավիճակից ու դրանք անպայման կգտնեն։ Այս մասին լրագրողներին ասել է ՌԴ նախագահի մամուլի խոսնակ Դմիտրի Պեսկովը, գրում է ՏԱՍՍ-ը։
«Տնտեսական առումով դժվարություններ կան, դա նաև բացասական ազդեցություն ունի մեր բիզնես երկխոսության վրա։ Արևմուտքի այս ճնշումը շրջանցելու ուղիներ ենք փնտրում, անպայման կգտնենք։ Ամերիկացիներն ու բրիտանացիները, ինչպես նաև նրանց ստեղծած քվազի-հետախուզական մարմիններն աննախադեպ ճնշում են գործադրում պատժամիջոցների ռեժիմներին համապատասխանելու համար»,- ասել է Պեսկովը։
Նրա պնդմամբ՝ այդ ներկայացուցիչները «գալիս են Անկարա, հավաքում պաշտոնյաներին և բիզնեսի ղեկավարներին և կոպիտ կերպով սպառնում նրանց»։
«Որոշ երկրներում, օրինակ՝ Չինաստանում, դա անում են ավելի քաղաքավարի։ Թուրքիայի համար կարող է ավելի դժվար լինել դիմակայել այդ ճնշումներին՝ հաշվի առնելով, ի թիվս այլ բաների, երկրի տնտեսական խնդիրները»,- ասել է Կրեմլի խոսնակը։
