«Գազպրոմ»-ը չի կարողանա վերադարձնել գազի վաճառքի նախապատերազմյան ծավալները․ հաշվետվություն

Ռուսական «Գազպրոմ» ընկերությունն առաջիկա տարիներին չի կարողանա վերականգնել Ուկրաինայի դեմ Ռուսաստանի լայնածավալ ագրեսիայի հետևանքով պատժամիջոցների հետևանքով կորցրած գազի վաճառքի ծավալները։ Այս մասին գրում է բրիտանական The Financial Times-ը՝ վկայակոչելով ընկերության ղեկավարության պատվերով 2023 թվականի վերջին պատրաստված հաշվետվության տվյալները, փոխանցում է DW-ի ռուսական ծառայությունը։

««Գազպրոմ»-ի և էներգետիկ ոլորտի համար պատժամիջոցների հիմնական հետևանքը դարձել է արտահանման ծավալների կրճատումը, որը 2020 թվականի մակարդակի չափով կվերականգնվի 2035 թվականից ոչ շուտ»,- ասվում է փաստաթղթում։

Վերլուծաբանների գնահատականներով՝ Եվրոպա գազի արտահանումը 2035 թվականին կկազմի միջինը տարեկան 50-75 մլրդ խորանարդ մետր։ Միևնույն ժամանակ, ըստ Եվրոստատի տվյալների՝ նախապատերազմյան 2021 թվականին «Գազպրոմ»-ը Եվրոպա է մատակարարել 141 միլիարդ խորանարդ մետր գազ, իսկ ընկերության ընդհանուր արտահանումը գերազանցել է 200 միլիարդ խորանարդ մետրը:

Ընկերությունը հույս է ունեցել, որ Չինաստան մատակարարումները կարող են փոխհատուցել եվրոպական շուկայի կորուստները, սակայն «Սիբիրի ուժը-2» գազատարի նոր ճյուղի կառուցման շուրջ բանակցությունները, որը նախատեսված էր տարեկան 50 միլիարդ խորանարդ մետր գազի համար, մտել են փակուղի։ Ըստ Financial Times-ի՝ պատճառը Պեկինի անզիջում դիրքորոշումն է, որը ցանկանում է գազ գնել ներքին ռուսական գներով։ Այս մասին միջազգային այլ լրատվամիջոցներ նույնպես տեղեկություններ էին տարածել։