Գառնիկ Դանիելյանը նորակառույցում բնակարան է գնել․ ինչ է հայտարարագրել ընդդիմադիր պատգամավորը

ԱԺ «Հայաստան» խմբակցության պատգամավոր, ՀՅԴ անդամ Գառնիկ Դանիելյանն անցած տարի նոյեմբերին բնակարան և ավտոկայանատեղի է գնել Երևանի Կոմիտաս պարկ թաղամասում, որի համար կառուցապատող «Օրդ Դեվելոփմենթ» ՍՊԸ-ին վճարել է մոտ 32․3 մլն։ Միաժամանակ, պատգամավորի հայտարարագրի համաձայն, նա նաև 2 փոխառություն է տվել նույն «Օրդ Դեվելոփմենթ» ՍՊԸ-ին՝ ընդհանուր 24 մլն դրամ՝ բնակարանի գնման իրավունքի համար։

Գեղարքունիքի Գեղամավան համայնքում ունեցած 2 հողամասերը Դանիելյանը 2023 թ-ին վաճառել է՝ ընդհանուր մոտ 1․9 մլն դրամով։ Պատգամավերը հայտարարագրել է նաև ավելի վաղ ձեռք բերված հասարակական նշանակության շինություն, հողամաս և բնակարան Տավուշի Իջևան համայնքում, և Երևանի Նոր Նորքում բնակարան։ Նա 90 օրից ավելի վարել է այլ անձի պատկանող TOYOTA մակնիշի ավտոմեքենա։

Պատգամավորի բանկային հաշվին տարեվերջին եղել է 1․2 մլն դրամ, կանխիկ ունեցել է 5 մլն դրամ և 25 հազար դոլար։ Դանիելյանն Ազգային ժողովից ստացել է 9․5 մլն դրամ աշխատավարձ, «Ինեկոբանկ»-ից վերցրել է մոտ 25․8 մլն դրամ վարկ։ Նրա վարկի մայր գումարի մնացորդը տարեվերջին կազմել է մոտ 18․8 մլն դրամ, որից 17․6 մլն-ը հիփոթեք է, վարկի մարմանն ուղղել է 4․7 մլն դրամ։ Տարվա ընթացքում 2 մլն դրամը գերազանցող միանվագ ծախս է արել՝ 3․5 մլն դրամ ծավալով։

Դաինելյանի կինը՝ Իդա Ղալումյանը, բացի նոր ձեռքբերված բնակարանից, հայտարարագրել է նաև 2 մլն դրամ կանխիկ գումար։ «Ինեկոբանկ»-ից ստացած վարկի դեպքում նա ամուսնու հետ համավարկառու է, նաև «Յունիբանկ»-ից 2․1 մլն դրամի վարկ է ստացել։ Ղալումյանն իր հերթին 2․9 մլն դրամի միանվագ ծախս է արել։

Գայանե Խաչատրյան