16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
ՌԴ Դաշնային խորհուրդը հավանություն է տվել ԵՏՄ-ի և Իրանի միջև ազատ առևտրի մասին համաձայնագրի վավերացմանը
Քաղաքականություն
05.06.2024 | 18:13
Դաշնային խորհուրդը 2024 թվականի հունիսի 5-ի նիստում հավանություն է տվել մի կողմից Եվրասիական տնտեսական միության (ԵՏՄ) և նրա անդամ երկրների, մյուս կողմից՝ Իրանի Իսլամական Հանրապետության միջև ազատ առևտրի մասին համաձայնագրի վավերացմանը։ Այս մասին հայտնում է ՌԴ խորհրդարանի վերին պալատի մամուլի ծառայությունը, գրում է Port news-ը։
Համաձայնագիրը կփոխարինի 2018 թվականի մայիսից գործող ժամանակավոր համաձայնագրին, որը կհանգեցնի ԵՏՄ-ի և Իրանի միջև ազատ առևտրի գոտու ձևավորմանը։ Փաստաթուղթը սահմանում է կողմերի միջև առևտրի հիմնական կանոնները՝ հնարավորինս մոտ Առևտրի համաշխարհային կազմակերպության (ԱՀԿ) կանոններին:
Այդ կանոնների թվում են առավել բարենպաստման ռեժիմը և ազգային ռեժիմը, պաշտպանիչ միջոցների և մաքսային վարչարարության կիրառումը, ապրանքների ներմուծման քանակական արգելքների և սահմանափակումների կիրառումից հրաժարումը, ինչպես նաև անասնաբուժական, սանիտարական և բուսասանիտարական միջոցների մասով ԱՀԿ բազային ստանդարտներն ամրագրող դրույթները և տեխնիկական կարգավորման դրույթները:
Ի լրումն ԱՀԿ ստանդարտ կանոնների՝ համաձայնագիրը նախատեսում է պարտավորություններ, որոնք դուրս են դրանց շրջանակներից, բայց, այդուհանդերձ, կիրառվում են ԵՏՄ-ում։ Ամրագրվում են տեխնիկական կանոնակարգերի հրապարակման և ուժի մեջ մտնելու միջև 180-օրյա անցումային շրջանի ապահովման պարտավորությունները։ Ինչպես նշված է օրենքին կից փաստաթղթերում, այս դրույթը «բարձրացնում է Իրանի առևտրային ռեժիմի թափանցիկությունը և հավասարեցնում է ԵՏՄ-ի հետ կարգավորող միջավայրը, որն արդեն գործում է այս սկզբունքով»։
