«Պուտինը խելագար չէ, նա վտանգավոր է․ սա շատ ավելի սարսափելի է»․ Զելենսկին ՌԴ-ի հետ բանակցություններն անիրատեսական է անվանել

Ուկրաինայի նախագահ Վլադիմիր Զելենսկին The Guardian-ին տված հարցազրույցում ՌԴ նախագահ Վլադիմիր Պուտինին համեմատել է Ադոլֆ Հիտլերի հետ։
Ուկրաինացի առաջնորդի խոսքով՝ ռուսական լայնամասշտաբ ներխուժումն Ուկրաինա նման է Երկրորդ համաշխարհային պատերազմին, բայց ավելի փոքր մասշտաբով։
Զելենսկին խոսել է «ռուսական ֆաշիզմի գաղափարախոսության» մասին. նա կարծում է, որ Պուտինի դաժան «մեթոդները», ներառյալ «զանգվածային մահապատիժները, հուղարկավորություններն ու բռնաբարությունները», համեմատելի են նացիստական Գերմանիայի դեմ պայքարի հետ։
2022 թվականին Կիևի վրա հարձակման ժամանակ, ըստ Ուկրաինայի նախագահի, ռուս զինվորականները օգտագործել են «նույն մեթոդները», ինչ Հիտլերի բանակը։
«Եթե Ռուսաստանը հաղթի Ուկրաինայում, Պուտինը կձգտի հետագայում ևս վերագծել Եվրոպայի սահմանները՝ հարձակվելով այլ երկրների վրա։ Ես չեմ կարծում, որ Պուտինը խելագար է, նա վտանգավոր է․ դա շատ ավելի սարսափելի է: Հիշե՛ք, նա կանգ չի առնի»,- ասել է նա։
Զելենսկին կարծում է, որ Ռուսաստանի հետ բանակցություններն «անիրատեսական» են, և որ Մոսկվայի հետ խաղաղության համաձայնագիրը ծուղակ կլինի, քանի որ Պուտինին, Ուկրաինայի ղեկավարի խոսքերով, չի կարելի վստահել։ Ըստ Զելենսկիի՝ Մոսկվան կօգտվի ռազմական գործողությունների ցանկացած դադարից՝ «մարտի դաշտում իր մկաններն ուժեղացնելու և վաղ թե ուշ կրկին հարվածելու համար»։