Քաղաքականություն
30.05.2024 | 18:46
Պրահայում մեկնարկում է ՆԱՏՕ-ի արտգործնախարարների ոչ պաշտոնական հանդիպումը, որին, ի թիվս այլոց, մասնակցում է ՆԱՏՕ-ի գլխավոր քարտուղար Յենս Ստոլտենբերգը։ Հանդիպումից առաջ Ստոլտենբերգն ասել է, որ Ուկրաինայի զինված ուժերը դեռ կարող են հաղթել մարտի դաշտում, սակայն դրա համար Կիևին անհրաժեշտ կլինի ՆԱՏՕ-ի զգալի աջակցությունը, գրում է BBC-ի ռուսական ծառայությունը։
«Ուկրաինան շարունակում է քաջաբար պայքարել, սակայն նրա առջև ծառացած մարտահրավերները մեծ են և աճում են: Ուկրաինան դեռ կարող է հաղթել, բայց միայն ՆԱՏՕ-ի դաշնակիցների շարունակական ուժեղ աջակցությամբ: Հետևաբար, հուլիսին կայանալիք ՆԱՏՕ-ի գագաթնաժողովի ժամանակ մենք նախատեսում ենք ուժեղացնել մեր աջակցությունը, որը կներառի ՆԱՏՕ-ի ավելի ուժեղ դերակատարումը պաշտպանական օգնության և ուսուցման համակարգման գործում, ինչպես նաև՝ բազմամյա ֆինանսական պարտավորությունները»,-ասել է Ստոլտենբերգը: Գլխավոր քարտուղարը նաև ասել է, որ ժամանակն է, որ արևմտյան դաշնակիցները վերանայեն Ուկրաինային տրամադրվող զենքի օգտագործման որոշ սահմանափակումները։ Վերջին շաբաթների ընթացքում Կիևը կոչ էր անում արևմտյան երկրներին վերացնել Ռուսաստանի տարածքում գտնվող թիրախներին հարվածելու համար ՆԱՏՕ-ի զենքի օգտագործման արգելքը։
