Ճնշում՝ դատավորների նկատմամբ, թե՞ վեթինգ․ ինչի՞ն են միտված կարգապահական վարույթները․ ՔՆՆԱՐԿՈՒՄ

Ի՞նչ խնդիր են լուծում դատավորների նկատմամբ հարուցվող կարգապահական վարույթները, որոնք քննվում են ԲԴԽ-ում։ Միայն 2023-ին դատական համակարգից հեռացվել է 7 դատավոր։ 2018-ից ի վեր 5 տարում դադարեցվել է մոտ երկու տասնյակ դատավորի լիազորություն։ Սակայն պրոցեսը հարցեր է հարուցել մասնագիտական հանրույթի մոտ՝ ի՞նչ սկզբունքով են որոշվում այն դատավորները, որոնց գործերը նախ պետք է ուսումնասիրվեն վարույթ հարուցողների կողմից՝ Արդարադատության նախարարություն, Էթիկայի և Կոռուպցիայի կանխարգելման հանձնաժողովներ։ Կարևոր է նաև հարցը՝ ի՞նչ չափանիշներով է ԲԴԽ-ն որոշում պատասխանատվության ենթարկել դատավորին, և հատկապես՝ դադարեցնել լիազորությունները։

ԱՄՆ Պետդեպը նույնպես անդրադարձել է կարգապահականների խնդրին․ «Շարունակաբար հաղորդումներ էին հայտնվում «անցանկալի» դատավորների դեմ ընտրովի կարգապահական վարույթներ սկսելու մասին և Արդարադատության նախարարության կողմից ԲԴԽ ներկայացվող կարգապահական վարույթների ընտրության վերաբերյալ որոշումների հետ կապված թափանցիկության բացակայության մասին»։ Պետդեպը հղում է անում իրավապաշտպան-փաստաբանների պնդումներին, որ կարգապահական վարույթների հարցում Արդարադատության նախարարության և ԲԴԽ-ի միջև համագործակցության մասին, ինչը խաթարում էր գործադիրից դատական համակարգի անկախ լինելու հանգամանքը։

ԲԴԽ-ն այս պրոցեսը ներկայացնում է իբրև դատական համակարգում վեթինգի իրականացում։ Պնդում են, թե դատական համակարգը մաքրվում է և փոխարինելու են գալիս անաչառ դատավորները։ 2023-ի տարեվերջին ԲԴԽ նախագահ Կարեն Անդրաեասյանը պնդեց, թե 80 տոկոսով վեթինգը իրականացվել է։ Մինչդեռ քննադատները համոզված են, որ այս գործընթացը ավելի շատ քաղաքական մոտիվներ ունի, մասնավորապես՝ ազատվել անցանկալի դատավորներից և կազմավորել օրվա իշխանությանը լոյալ դատական համակարգ։

Ի՞նչ է իրականում տեղի ունենում դատական համակարգի հետ՝ առողջացում արդար վեթինգի միջոցով, թե՞ հնազանդ դատական համակարգի ստեղծում։ Factor TV-ի բանավեճին մասնակցում են Արշակ Վարդանյանը՝ ԲԴԽ նախկին անդամ, նախկին դատավոր, Հարություն Հարությունյանը՝ Դատավորների ընդհանուր ժողովի Էթիկայի հանձնաժողովի անդամ, փաստաբան Մարիաննա Բաղինյանը՝ Կոռուպցիայի կանխարգելման հանձնաժողովի ներկայացուցիչ, Արտյոմ Սուջյանը՝ Արդարադատության նախարարի խորհրդական։