Եվրախորհրդարանի գրասենյակները խուզարկվել են ռուսական ազդեցության գործի շրջանակում

Բելգիայի և Ֆրանսիայի ոստիկանությունն այսօր առավոտյան, միաժամանակ խուզարկություններ է իրականացրել Եվրախորհրդարանի (ԵԽ) Բրյուսելում և Ստրասբուրգում գտնվող գրասենյակներում։ Խուզարկվել է նաև խորհրդարանի աշխատակիցներից մեկի՝ Բրյուսելի Շաերբեկ թաղամասում գտնվող տունը։ Այս մասին հայտնում է Euronews-ը։

Խուզարկություններն անցկացվել են հետաքննության շրջանակներում, որոնք կապված են ռուսական ազդեցության տարածման արշավի հետ, որի ընթացքում Եվրախորհրդարանի անդամներին գումար են վճարել՝ փաստացի եվրոպական կառույցների կենտրոնից՝ Բրյուսելից, կրեմլամետ քարոզչություն տարածելու համար։
Բելգիայի դատախազները հաստատել են, որ խուզարկություններն իրականացվել են «ազդեցության, թաքնված կոռուպցիայի մեղսակցության և հանցավոր կազմակերպությանն անդամակցության դրսևորումների» դեպքերի առնչությամբ։

Մարտի վերջին Չեխիայի իշխանությունները հայտարարել էին, որ իրենք բացահայտել են ռուսական ազդեցության արշավը, որն իրականացվել է «Եվրոպայի ձայն»-ի միջոցով՝ պնդելով, որ ֆինանսական փոխանցումները կատարվել են ինչպես ուղղակիորեն Եվրախորհրդարանի պատգամավորներին, այնպես էլ ազգային խորհրդարանների պատգամավորներին։ Հայտնի է, որ այս ցանցը ղեկավարում էր ուկրաինացի նախկին պատգամավոր Վիկտոր Մեդվեդչուկը։
Ըստ չեխական ԶԼՄ-ների, որոնք վկայակոչում են հետախուզական ծառայությունների ներկայացուցիչներին, մեղադրանքներն առնչվում են Գերմանիայից, Ֆրանսիայից, Լեհաստանից, Բելգիայից, Նիդեռլանդներից և Հունգարիայից քաղաքական գործիչներին: