Քաղաքականություն
29.05.2024 | 21:42
Մոսկվայում ոստիկանությունը խուզարկություն է իրականացրել զինապարտության տարիքի տղամարդկանց շրջանում։ Նրանց հետապնդել են փողոցում, մետրոյում, առևտրի կենտրոններում, իսկ ոմանց բերման են ենթարկվել աշխատավայրից կամ իրենց տներից, այնուհետ նրանց տարել են Ուգրեշսկայայի հավաքակայան։ Արդյունքում այնտեղ է հայտնվել առնվազն 54 մարդ, պատմել է բերման ենթարկվածներից մեկի մայրը՝ Օքսանա Պարշինան, գրում է Mediazona-ն։ «Դրանք կամ ախտորոշմամբ մարդիկ են, ովքեր պիտանի չեն ծառայության համար, կամ մարդիկ են, ովքեր դեռևս պետք է ծանուցագրերով ներկայանան, ոմանք էլ՝ տարկետում ունեցող ուսանողներ են»,-պատմել է նա։ Պարշինայի խոսքով՝ նրանցից մի քանիսին ծանուցել են բուժզննության համար զինկոմիսարիատ ներկայանալու համար, սակայն այնուհետ փակել են այնտեղ ու խլել են հեռախոսները։ Տեղեկությունը հաստատել են այլ բերման ենթարկվածների հարազատները։
Աղջիկներից մեկը «Օստորոժնա, Մոսկվա» Telegram ալիքին պատմել է, որ իր ընկերը՝ 2001 թվականին ծնված Կիրիլը, որի մոտ ախտորոշվել է խրոնիկական ծանր ասթմա, զինծառայության համար պիտանի է ճանաչվել՝ չնչին սահմանափակումներով։
Նա որոշումը բողոքարկել է դատարանում, հայցը պետք է քննարկվի հուլիսին։ Չնայած դրան, մայիսի 24-ին երիտասարդին բերման են ենթարկել՝ պատճառաբանելով, որ նրա նկատմամբ քրեական հետախուզում է իրականացվում, բայց նրան ուղարկել են հավաքագրման կետ։ Նրան չի օգնել այն, որ նա իր հետ փաստաթղթեր է ունեցել, որոնք հաստատում են հայցի առկայությունը:
