10.04.2026 | 13:56
Միջերկրական ծովից ներթափանցած ակտիվ ցիկլոնը կպահպանվի մինչև ապրիլի 13-ը ներառյալ
ԵՄ 7 երկրների խորհրդարանների նախագահները դիմել են Վրաստանի ԱԺ ղեկավարին՝ հետ կանչելու «օտարերկրյա գործակալների» մասին օրենքը
Քաղաքականություն
28.05.2024 | 16:07
ԵՄ անդամ 7 երկրների խորհրդարանների խոսնակները նամակով դիմել են Վրաստանի խորհրդարանի նախագահ Շալվա Պապուաշվիլիին՝ կոչ անելով հետ կանչել «օտարերկրյա գործակալների» մասին օրենքը և թողնել Վրաստանը ԵՄ-ի ճանապարհին։ Նամակում նշվում է, որ իրենք ականատես են եղել Վրաստանի «ուշագրավ քաղաքական վերափոխմանը» և բարեփոխումների համար ներդրված «ահռելի ջանքերին», որոնք Վրաստանը դարձրել են «օրինակ մյուս հավակնորդների համար»։
«Մենք հպարտությամբ աջակցել ենք ձեզ և հանձնառու ենք շարունակել տրամադրել անհրաժեշտ օգնությունը՝ ապահովելու համար, որ դուք շարունակեք այս ճանապարհը»,- ասվում է հայտարարության մեջ։
Նշվում է, որ անցյալ տարի «Վրաստանը ստացել է անդամակցության բանակցություններ սկսելու հստակ ճանապարհ»։
Սակայն, ըստ նամակի հեղինակների, Վրաստանի վերջին որոշումները մտահոգության տեղիք են տալիս, քանի որ կառավարության գործողությունները «հակասում են այն արժեքներին ու սկզբունքներին, որոնցով խոստացել են առաջնորդվել, և որոնք ընկած են եվրոպական նկրտումների հիմքում»։ Խորհրդարանների խոսնակները նշում են, որ «օտարերկրյա գործակալների» մասին օրենքի «ոգին և բովանդակությունն անհամատեղելի են եվրոպական նորմերի և արժեքների հետ» և կոչ են արել հետ կանչել այն ու կազմակերպել «իմաստալից և ներառական երկխոսություն քաղաքացիական հասարակության և քաղաքացիների հետ»։
«ԵՄ-ին միանալու որոշումը Վրաստանի և նրա ժողովրդի ինքնիշխան ընտրությունն է, ինչպես նրանք, որոնք ԵՄ-ին միացել են 20 տարի առաջ: Այս ճանապարհը ո՛չ երաշխավորված էր, ո՛չ էլ հեշտ։ Ընկերների անսասան հանձնառությունն ու աջակցությունը դա հնարավոր դարձրեց։ Մեր մեջ դուք ընկերներ ունեք: Մենք անկեղծորեն հույս ունենք, որ Վրաստանը չի տատանվի իր հանձնառության մեջ՝ օգտագործելու պատմական հնարավորությունների պատուհանը՝ վրաց ժողովրդին խաղաղության և բարգավաճման, ինչպես նաև ազատությունների ու արժեքների ընդհանուր տարածություն բերելու համար։ Մենք հավատում ենք Վրաստանի եվրոպական ապագային և պատրաստ ենք աջակցել ձեզ»,- ասվում է նամակում։
Նամակը ստորագրել են Չեխիայի Սենատի նախագահ Միլոշ Վիստրչիլը, Չեխիայի խորհրդարանի Պատգամավորների պալատի նախագահ Մարկետա Պեկարովա-Ադամովան, Էստոնիայի խորհրդարանի նախագահ Լաուրի Գուսարը, Ֆրանսիայի Ազգային ժողովի նախագահ Յաել Բրաուն Պիվետը, Լատվիայի Սեյմի նախագահ Դայգա Միերինան, Լիտվայի Սեյմի նախագահ Վիկտորյա Կմիլիտե-Նիլսենը, Նիդերլանդների Ներկայացուցիչների պալատի նախագահ Մարտին Բոսման, Լեհաստանի Սենատի ղեկավար Մալգորժատա Կիդավա-Բլոնսկան, Լեաստանի Սեյմի ղեկեվար Շիման Հոլովնիան։
