Քաղաքականություն
28.05.2024 | 16:26
ԱՄՆ նախագահ Ջո Բայդենի վարչակազմն Իսրայելից պահանջել է բոլոր նախազգուշական միջոցները ձեռնարկել խաղաղ բնակիչներին պաշտպանելու համար այն բանից հետո, երբ Ռաֆահում իսրայելական հարվածի հետևանքով տասնյակ պաղեստինցիներ են զոհվել, գրում է VOA-ն:
Պահանջն ուղղվել է Բայդենի որոշ գործընկեր դեմոկրատների կոչերի ֆոնին՝ դադարեցնել ռազմական մատակարարումները Իսրայելին:
«Իսրայելն իրավունք ունի հետապնդելու ՀԱՄԱՍ-ին, և մենք հասկանում ենք, որ այս հարվածը սպանել է ՀԱՄԱՍ-ի երկու բարձրաստիճան ահաբեկիչների, ովքեր պատասխանատու էին Իսրայելի քաղաքացիների վրա հարձակումների համար։ Բայց մենք հստակ հասկացրել ենք, որ Իսրայելը պետք է ձեռնարկի բոլոր հնարավոր նախազգուշական միջոցները՝ խաղաղ բնակիչներին պաշտպանելու համար»,- ասել է Ազգային անվտանգության խորհրդի խոսնակը:
Մինչ կիրակի տեղի ունեցած հարվածն էլ, որի հետևանքով Ռաֆահի ճամբարում այրվեցին վրաններն ու խարխուլ մետաղական կացարանները, ինչպես նաև սպանվեց 45 մարդ, Բայդենը բախվում էր իր կուսակիցների աճող ճնշմանը՝ Իսրայելին աջակցությունը կրճատելու համար:
Ներկայացուցիչների պալատի ազդեցիկ դեմոկրատ Ալեքսանդրիա Օկասիո-Կորտեսն իսրայելական հարվածն անվանել է «արդարացում չունեցող վայրագություն»:
«Վաղուց ժամանակն է, որ նախագահը կատարի իր խոսքը և դադարեցնի ռազմական օգնությունը»,- գրել է նա սոցցանցում:
«Անցած գիշեր սարսափելի և սրտաճմլիկ կադրեր են ստացվել Ռաֆահից։ Դեռ որքա՞ն պետք է Միացյալ Նահանգները մի կողմ քաշվի, մինչ իսրայելցի զինվորականները սպանում և խեղում են պաղեստինցի երեխաներին»,- իր հերթին նշել է Ներկայացուցիչների պալատի անդամ Այաննա Փրեսլին:
Իսրայելի վարչապետ Բենիամին Նեթանյահուն երկուշաբթի ասել է, որ խաղաղ բնակիչներին վնաս հասցնելը չի եղել հարվածի նպատակը, սակայն «իրադարձությունները ողբերգական ընթացք են ստացել»:
