14.01.2026 | 22:39
Ինչ իրավիճակ է ճանապարհներին
Մոսկվայի մարզի նահանգապետը հայտնել է Բալաշիխայում ԱԹՍ-ի խոցման հետևանքով տուժածների մասին
Քաղաքականություն
28.05.2024 | 13:10
Մոսկվայի մարզի նահանգապետ Անդրեյ Վորոբյովը հայտնել է, որ մայիսի 27-ի երեկոյան մերձմոսկովյան Բալաշիխայում անօդաչու թռչող սարք է խոցվել։ Քաղաքային շրջանի ղեկավար Սերգեյ Յուրովի տեղեկացմամբ էլ՝ երկու տղամարդ վնասվածքներ են ստացել բեկորների ընկնելու հետևանքով, փոխանցում է Current Time-ը։
Նախապես հաղորդվում էր, որ անօդաչու թռչող սարքի բեկորների ընկնելու հետևանքով ոչ ոք չի տուժել։
Շրջանի ղեկավարը պնդել է, որ խոցված ԱԹՍ-ի բեկորներն ընկել են առանձնատան վրա։ Յուրովը պարզաբանել է, որ այնտեղ եղել են տարեց ամուսիններ, նրանց դուստրն ու թոռնուհին, և նրանք չեն տուժել։
«Բացի այդ, հարևան փողոցում բեկորներն ընկել են երկու տղամարդու վրա։ Նրանցից մեկին տեղում բուժօգնություն է ցուցաբերվել։ Երկրորդը միջին ծանրության վնասվածքներով հոսպիտալացվել է շրջանային հիվանդանոցում, կյանքին վտանգ չի սպառնում»,- նշել է Յուրովը Տելեգրամում։
ՌԴ ՊՆ-ն ավելի վաղ հայտնել էր, որ ժամը 21:00-ի սահմաններում Մոսկվայի շրջանի երկնքում փոքրիկ օդապարիկ է խոցվել։ ՏԱՍՍ գործակալությունը, հղում անելով ավիացիոն ծառայություններին, հայտնել էր, որ Մոսկվայի օդանավակայաններում փոխվել են ինքնաթիռների թռիչքի և վայրէջքի երթուղիները։
Վերջին անգամ ՌԴ ՊՆ-ն Մոսկվայի շրջանում անօդաչու թռչող սարքի ոչնչացման մասին հայտնել էր մայիսի 10-ին։
