Եվրամիության ԱԳ նախարարները քննարկել են Վրաստանում տիրող իրավիճակը

Բրյուսելում ԵՄ արտաքին հարաբերությունների խորհրդի նիստում քննարկվում է Վրաստանում «օտարերկրյա գործակալների» մասին օրենքի հաստատման հետ կապված իրավիճակը։ Որևէ որոշման ընդունում քննարկումների արդյունքում չի սպասվում, փոխանցում է «Գրուզիա օնլայնը»։

Եվրամիության արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելի խոսքով՝ նախարարները «գնահատական կտան Վրաստանում տիրող իրավիճակին»։

«Պարզ է, որ կառավարությունը հեռանում է եվրոպական ճանապարհից, և նախարարները պետք է որոշեն, թե ինչ անեն։ Վրաստանի հարցն օրակարգի լիարժեք հարց չէ։ Սա նախարարների մակարդակով իրավիճակի առաջին գնահատականն է»,- նշել է նա։

Լիտվայի արտգործնախարար Գաբրիելիուս Լանդսբերգիսը լրագրողների հետ զրույցում չի բացառել, որ Վրաստանը կարող է զրկվել ԵՄ-ին անդամակցելու թեկնածուի կարգավիճակից։

«Հուսով եմ, որ ԵՄ-ն շատ հստակ ազդանշան կուղարկի, որ եթե օրենքն ընդունվի իր վերջնական տարբերակով, Վրաստանն այլևս չի կարողանա շարունակել իր ճանապարհը դեպի ԵՄ»,- ասել է նա։

Լանդսբերգիսը նշում է, որ Վրաստանը կարգավիճակ է ստացել որոշակի առաջարկությունների կատարման պայմանով։

«Եթե պայմանները չկատարվեն, ապա թեկնածուի կարգավիճակն այլևս գոյություն չի ունենա»,- նշել է նա։

Հարցին՝ արդյո՞ք Վրաստանը կարող է կորցնել թեկնածուի կարգավիճակը, նախարարը պատասխանել է. «Քաղաքական առումով՝ այո՛, քանի որ այն դեռևս քաղաքական հայեցակարգ է: Այսպիսով [թեկնածուի կարգավիճակը] կարող է կասեցվել»։

«Օտարերկրյա գործակալների» մասին օրենքն անհամատեղելի է եվրոպական արժեքների հետ, իր հերթին հայտարարել է Գերմանիայի արտաքին գործերի նախարար Աննալենա Բերբոքը։