Ադրբեջանցի բարձրաստիճան պաշտոնյաների դեմ պատժամիջոցների մասին ԱՄՆ Կոնգրեսի օրինագծի համահեղինակների թիվն ավելացել է

«2024 թվականին Ադրբեջանի նկատմամբ պատժամիջոցների մասին» օրինագծին, որը պատժամիջոցներ է նախատեսում Ադրբեջանի 44 բարձրաստիճան պաշտոնյաների նկատմամբ՝ Արցախյան պատերազմում նրանց դերակատարման և մարդու իրավունքների ոտնահարման համար, ևս 7 համահեղինակ է միացել Կոնգրեսում մեկ ամիս առաջ ներկայացվելուց հետո։

Ադրբեջանական Թուրան գործակալությունը հայտնում է, որ օրինագիծը, որն իր տեսակի մեջ առաջինն է, ներկայացվել էր ապրիլի 26-ին Նևադայից դեմոկրատ Դինա Տիտուսի և 24 այլ համահեղինակների կողմից։ Այսօր դրա համահեղինակների թիվը հասել է 31-ի: Նախաձեռնությանը միացել են դեմոկրատներ Դենիել Քոլդմանը, Մայք Կուլիգանը, Աննա Էշուն, Լինդա Սանչեսը, Ջուդի Չուն, Լորի Թրեհանը և հանրապետական Միշել Սթիլը։

Ներկայացվելուց հետո օրինագիծը փոխանցվել է Կոնգրեսի արտաքին հարաբերությունների և դատական ​​հանձնաժողովներին, սակայն հետագա քայլեր դեռ չեն ձեռնարկվել:

Եթե այն  ​ընդունվի, Կոնգրեսը Բայդենի վարչակազմից կպահանջի 180 օրվա ընթացքում հաստատել, արդյոք Ադրբեջանի՝ ցուցակում առկա  44 պաշտոնյաները ենթակա են Մագնիտսկու ակտի պատժամիջոցների՝ պատերազմին նրանց մասնակցության և Ադրբեջանում քաղաքական ընդդիմության դաժան ճնշումների համար:

Հավելենք, որ օրինագծում ներկայացված ադրբեջանցի պաշտոնյաները Պաշտպանության նախարարության, Գլխավոր դատախազության, Բաքվի ծանր հանցագործությունների դատարանի, Ներքին գործերի նախարարության, Պետական ​​անվտանգության ծառայության, Քրեակատարողական ծառայության, Պետական ​​սահմանային ծառայության և նախագահի աշխատակազմի ներկայացուցիչներն են։

Ցանկում են, մասնավորապես, Ադրբեջանի ԶՈՒ ԳՇ պետ Քերիմ Վելիևը, Ադրբեջանի հատուկ նշանակության ուժերի նախկին հրամանատար, այժմ ցամաքային զորքերի հրամանատար, պաշտպանության փոխնախարար Հիքմեթ Միրզոևը, ռազմական ոստիկանության պետ, փոխգնդապետ Էլգյուն Ալիևը, Ադրբեջանի 218-րդ կոմանդո-բրիգադի հրամանատար, գնդապետ Էլշան Սանաևը, Ադրբեջանի ցամաքային զորքերի նախկին հրամանատար, գեներալ-լեյտենանտ Անվար Աֆանդիևը, Պետանվտանգության ծառայության ղեկավար Ալի Նագիևը, նախագահ Իլհամ Ալիևի աշխատակազմի ղեկավար Սամիր Նուրիևը և այլ պաշտոնյաներ։

Էմմա Չոբանյան