04.06.2026 | 20:39
Գերմանիան առաջին անգամ չի ընտրվել ՄԱԿ-ի ԱԽ ոչ մշտական անդամ․ դրա համար Բեռլինը մեղադրում է ՌԴ-ին
Դյումայի «ChatGPT»-ի, անշրջելի փոփոխությունների և «Դոն Կիխոտը» նորից գրելու մասին. ապաքաղաքական զրույց Արքմենիկ Նիկողոսյանի հետ. ՏԵՍԱՆՅՈՒԹ
Հաղորդաշարեր
26.05.2024 | 21:00
Factor TV-ի A-politic հաղորդաշարի հյուրն է բանասեր և խմբագիր Արքմենիկ Նիկողոսյանը: Նրա կարծիքով՝ արհեստական բանականության, մասնավորապես, ChatGPT-ի ներմուծումը գրականության մեջ առայժմ որևէ սկզբունքային նորություն չի մտցրել:
Արդեն 19-րդ դարում գրողները (օրինակ՝ Ալեքսանդր Դյուման) ունեին «ենթավարպետներ», որոնք նրանց փոխարեն կատարում էին ամբողջ «սևագործ աշխատանքը»: Նոր տեխնիկական միջոցները, ինչպես այլ բնագավառներում, այդպես էլ գրականության մեջ, նպաստելու են ժամանակի խնայողությանը և հնարավորություն են տալու կենտրոնանալ զուտ ստեղծագործական խնդիրների վրա:
Հնարավո՞ր է, արդյոք, արհեստական բանականության միջոցով ստեղծել գրականություն, որը համարժեք կլինի համաշխարհային գլուխգործոցներին: Ըստ գրականագետի՝ դա առայժմ հնարավոր չէ, քանի որ ChatGPT-ն, այնուամենայնիվ, տալիս է «երկրորդական արդյունք»՝ օգտվելով մարդկանց կողմից ստեղծած տեքստերից: Թե ինչ կլինի, երբ ChatGPT-ն օգտվի նախկինում իր իսկ ստեղծած տեքստերից, դժվար է ասել: Այլ հարց է, որ այսօր մարդկանց կողմից ստեղծվող գրականությունը, հաղորդման հյուրի կարծիքով, դարձել է «պատմողական», մի տեսակ «անկենդանացել» է:
Արհեստական բանականությունը չափազանց օգտակար է լինելու թարգմանությունների և աուդիոգրքեր ստեղծելու հարցում: Բայց այստեղ էլ, ըստ Արքմենիկ Նիկողոսյանի, պետք է լինի մարդկանց միջամտությունը, առաջին դեպքում՝ բնագրի հեղինակի և նրա մշակույթի «իրողությունները» հասկանալու, երկրորդ դեպքում՝ սպառողի անհատական պահանջմունքները հաշվի առնելու համար:
Մանրամասները՝ տեսանյութում:
Արամ Աբրահամյան
