22.07.2026 | 10:45
Նորընտիր Ազգային ժողովի առաջին նիստը կգումարվի օգոստոսի 2-ին՝ կիրակի
ԵՄ չորս երկրներ կոչ են արել չեղարկել Վրաստանի հետ առանց վիզայի ռեժիմը, եթե «օտարերկրյա գործակալների մասին» օրենքը հաստատվի. FT
Քաղաքականություն
22.05.2024 | 14:58
Էստոնիան, Չեխիան, Շվեդիան և Նիդերլանդները կոչ են արել պատժամիջոցներ կիրառել Վրաստանի դեմ, ներառյալ՝ առանց վիզայի ռեժիմի չեղարկումը, եթե Թբիլիսին հատատի «օտարերկրյա գործակալների մասին» օրենքը, գրում է Financial Times-ը:
Հնարավոր տարբերակները, բացի Վրաստանի քաղաքացիների համար առանց վիզայի ռեժիմի չեղարկումը, ներառում են նպատակային պատժամիջոցներ և Եվրոպական միության հիմնադրամներից միջոցների սառեցում, պարբերականին հայտնել են երկու իրազեկ աղբյուրներ: Նրանցից մեկի խոսքով՝ եվրոպական իշխանությունները դիտարկում են «Վրաստանի կառավարության վրա ճնշում գործադրելու տարբեր միջոցներ»։
Իշխող «Վրացական երազանք» կուսակցությունը խոստացել է վերջնական տեսքի բերել օրենսդրությունը առաջիկա շաբաթների ընթացքում, միաժամանակ, դատապարտել է միջազգային ճնշումը այն բանից հետո, երբ ԱՄՆ պաշտոնյաները կոչ են արել նախագահ Ջո Բայդենի վարչակազմին՝ պատժամիջոցներ նախապատրաստել:
«Ամերիկացի որոշ քաղաքական գործիչներ և պաշտոնյաներ նախընտրում են շանտաժի լեզուն օգտագործել Վրաստանի հետ շփվելիս»,- ասվում է իշխող կուսակցության հայտարարության մեջ:
Ըստ նրանց՝ օրենքն անհրաժեշտ է, քանի որ 2020 թվականից ի վեր հասարակական կազմակերպությունները երկու անգամ փորձել են «հեղափոխություն անել»։
Միաժամանակ, Եվրամիությունը մտահոգված է, որ պատժամիջոցները և առանց վիզայի ռեժիմի չեղարկումը կարող են տհաճ հետևանքներ ունենալ օրենքի ընդունման դեմ բողոքող Վրաստանի քաղաքացիների համար։
«Պետք է զգույշ լինել, որպեսզի այդ մարդկանց թիրախ չդարձնենք»,- ասել է եվրոպացի դիվանագետներից մեկը:
