29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Թուրքիայի արդարադատության նախարարը ողջունել է Նեթանյահուին կալանավորելու օրդեր տրամադրելու՝ ՄՔԴ դատախազի պահանջը
Քաղաքականություն
21.05.2024 | 21:02
Թուրքիայի արդարադատության նախարար Յըլմազ Թունչը ողջունել է Միջազգային քրեական դատարանի գլխավոր դատախազ Քարիմ Խանի պահանջը՝ Իսրայելի վարչապետ Բենիամին Նեթանյահուի և պաշտպանության նախարար Յոավ Գալանտի կալանավորման օրդեր տրամադրելու վերաբերյալ, գրում են տեղական լրատվամիջոցները։
«Միջազգային քրեական դատարանի գլխավոր դատախազի դիմումը Իսրայելի վարչապետ Բենիամին Նեթանյահուի և Իսրայելի պաշտպանության նախարար Յոավ Գալանտի կալանքի օրդերի վերաբերյալ՝ կապված նրանց կողմից ռազմական հանցագործությունների և մարդկության դեմ հանցագործությունների իրականացման հետ, ուշացած, բայց դրական որոշում է»,- գրել է Թունչը սոցիալական ցանցի իր էջում։
Նա նշել է, որ հոկտեմբերի 7-ից Գազայի հատվածի և Ռաֆահի շրջանների վրա հարձակումներով Իսրայելը խախտել է միջազգային իրավունքը և անտեսել մարդու ամենահիմնական իրավունքները։
«Իսրայելցի պաշտոնյաները, որոնք հալածում են անմեղ մարդկանց, պետք է հնարավորինս շուտ կանգնեն արդարադատության հետ և պատասխան տան իրենց արարքների համար»,- նշել է թուրք նախարարը՝ հավելելով, որ Թուրքիան միշտ օրակարգում է պահելու «Իսրայելի կողմից իրականացված անարդարությունը, ցեղասպանությունը և մարդկության դեմ հանցագործությունները», ինչպես նաև աջակցություն կցուցաբերի «պաղեստինցի եղբայրներին իրենց արդար գործում»։
Հիշեցնենք, որ ՄՔԴ-ի գլխավոր դատախազ Քարիմ Խանը նախօրեին պահանջել է օրդերներ տալ՝ կալանավորելու Իսրայելի վարչապետ Բենիամին Նեթանյահուին, պաշտպանության նախարար Յոավ Գալանտին, ինչպես նաև ՀԱՄԱՍ շարժման երեք առաջնորդներին՝ Յահյա Սինվարին, Մուհամմադ Ալ-Մասրիին և Իսմայիլ Հանիեին:
