07.11.2026 | 16:24
TRIPP-ը անձամբ Թրամփի անձնական պրոյեկտը չի, այն բիզնես պրոյեկտ է, խնդիր չենք ունենա.Սիմոնյան. ՏԵՍԱՆՅՈՒԹ
Բրյուսելը հետաքննություն է սկսել Meta-ի դեմ՝ անչափահաս օգտատերերի անբավարար պաշտպանության համար
Քաղաքականություն
16.05.2024 | 22:12
Եվրահանձնաժողովը պաշտոնական հետաքննություն է սկսել ամերիկյան Meta կորպորացիայի դեմ՝ երեխաների և դեռահասների պաշտպանության համար ոչ բավարար միջոցներ ձեռնարկելու պատճառով, գրում է DW-ի ռուսական ծառայությունը։
Բրյուսելում ընկերությանը կասկածում են Թվային ծառայությունների եվրոպական ակտը (DAS) խախտելու մեջ, որը հատուկ պարտավորություններ է սահմանում ընկերությունների համար՝ պաշտպանելու անչափահաս օգտատերերին, հաղորդել է եվրոպական գերատեսչությունը։
Բրյուսելը կասկածում է, որ Facebook և Instagram սոցիալական ցանցերը, որոնք պատկանում են Meta-ին, և դրանցում ներդրված ալգորիթմները կարող են նպաստել երեխաների մոտ կախվածություն առաջացնող վարքագծի զարգացմանը, նշել է Եվրահանձնաժողովի ներկայացուցիչը։
Նա մատնանշել է, այսպես կոչված, «նապաստակի բնի էֆեկտի» առաջացումը, որի դեպքում օգտատերը, մի քանի էջից մյուսը տեղափոխվելով, կորցնում է սկզբնական նպատակը և ժամանակի զգացողությունը։
Ի թիվս այլ բաների՝ կուսումնասիրվեն այն միջոցները, որոնք Meta-ն ձեռնարկում է օգտատերերի տարիքը ստուգելու համար՝ երեխաներին ոչ պատշաճ բովանդակությունից պաշտպանելու համար: Ամերիկյան կորպորացիան, ըստ երևույթին, բավարար միջոցներ չի ձեռնարկում՝ «նվազագույնի հասցնելու երիտասարդ եվրոպացիների ֆիզիկական և մտավոր առողջության վրա բացասական ազդեցությունների ռիսկը Facebook և Instagram հարթակներում», ասել է ներքին շուկայի հարցերով ԵՄ հանձնակատար Թիերի Բրետոնը:
