06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Թուրքիայում 16-ամյա աղջկա են ձերբակալել Էրդողանի ավտոշարասյան ուղղությամբ հայհոյանքներ հնչեցնելու համար
Քաղաքականություն
15.05.2024 | 20:59
Թուրքիայում 16-ամյա աղջկա են ձերբակալել նախագահական գվարդիայի հրամանով՝ նախագահ Ռեջեփ Թայիփ Էրդողանի ավտոշարասյան ուղղությամբ, իբր, հայհոյանքներ հնչեցնելու համար։ Այս մասին գրում է Stockholm center of freedom-ը՝ վկայակոչելով թուրքական լրատվամիջոցներին։
Դեռահասը բացատրել է, որ ինքն արձագանքել է վախից, երբ տեսել է արագ մոտեցող մեքենան՝ սպասելով հետիոտնային անցման մոտ:
«Ես չէի պատկերացնում, որ որևէ պետական պաշտոնյա նախագահը, այնտեղ կլինի։ Ես երբեք չէի վիրավորի որևէ պետական պաշտոնյայի, այդ թվում՝ նախագահին։ Իմ արձագանքը սխալ է հասկացվել, և ես չեմ հայհոյել: Ես ուղղակի վախից արձագանքեցի։ Երբ ավտոշարասյունը հետևեց արագընթաց մեքենային, և մի պաշտոնյա միջամտեց, ես հասկացա, որ դա նախագահի ավտոշարասյունն է։ Ես հանցագործություն կատարելու դիտավորություն չեմ ունեցել»,- ասել է նա՝ հավելելով, որ ավագ դպրոցի աշակերտ է՝ առանց քրեական անցյալի։
Ստամբուլի դատարանը 16-ամյա աղջկան ազատ է արձակել դատական հսկողության ներքո՝ պահանջելով շաբաթը մեկ անգամ ներկայանալ ոստիկանական բաժանմունքում, բացի այդ, նրա նկատմամբ ճանապարհորդական արգելք է սահմանվել։
Նախագահին վիրավորելը Թուրքիայում հանցագործություն է՝ համաձայն Թուրքիայի քրեական օրենսգրքի վիճահարույց 299-րդ հոդվածի։ Նախագահին վիրավորողին սպառնում է մինչև չորս տարվա ազատազրկում, որը կարող է ավելացվել, եթե հանցագործությունը կատարվել է ԶԼՄ-ների միջոցով։
2014 թվականին Էրդողանի առաջին անգամ նախագահ ընտրվելուց հետո ավելի քան 160,000 մարդ է հետաքննության ենթարկվել վիրավորանքի մեղադրանքով։ Նրանցից 45,000-ի նկատմամբ քրեական գործ է հարուցվել, իսկ 13,000 մարդ դատապարտվել է։
Անցյալ տարի հետաքննության է ենթարկվել 972 անչափահաս՝ Էրդողանին կամ թուրքական պետությանը վիրավորելու մեղադրանքով։
Էմմա Չոբանյան
