Ոստիկանները խոչընդոտել են լրագրողների աշխատանքը․ Մերի Մանուկյանը կորցրել է գիտակցությունը

Այսօր վաղ առավոտից ոստիկանությունը բերման է ենթարկել խաղաղ անհնազանդության ակցիա իրականացնող 156 քաղաքացու։ Ակցիաներից մեկի ընթացքում ոստիկանները խոչընդոտել են լրագրողների մասնագիտական գործունեությունը։ Մասնավորապես, բերման են ենթարկել լրագրողի, որը թեև այդ պահին չի կրել համապատասխան փաստաթուղթ (բեյջ), սակայն հայտնել է, որ լրագրող է։ Հարվածել ու գետնին են գցել Abcmedia.am-ի օպերատորին, քաշքշել ու հրել են 24news.am լրատվական կայքի լրագրող Մերի Մանուկյանին, ինչի հետևանքով վերջինս կորցրել է գիտակցությունը։ Լրագրողն ակցիայի վայրից շտապօգնության մեքենայով տեղափոխվել է Հերացի թիվ մեկ համալսարանական հիվանդանոց։ Մերի Մանուկյանը Factor.am-ի հետ զրույցում ասաց, որ այս պահին գտնվում է բժիշկների հսկողության ներքո։

«Անցել եմ անհրաժեշտ բոլոր հետազոտությունները, ըստ նյարդաբանի և վիրաբույժի ամեն բան կարգին է, միայն ձախ ձեռքիս հատվածում քերծվածք ունեմ»,- ասաց լրագրողը։

Այս միջադեպերին արձագանքել է ՄԻՊ գրասենյակը։ Մարդու իրավունքների պաշտպանի գրասենյակից տեղեկացնում են, որ կապ են հաստատել լրագրող Մերի Մանուկյանի հետ՝ «տեղի ունեցած միջադեպի առնչությամբ տեղեկություններ ստանալու նպատակով»:

«Արձանագրված միջադեպերի կապակցությամբ պարզաբանումներ կպահանջվեն իրավասու մարմիններից: Մարդու իրավունքների պաշտպանն ընդգծում է, որ լրագրողների և լրատվամիջոցների մասնագիտական պաշտպանված և արդյունավետ աշխատանքն ունի մեծ հանրային կարևորություն։ Իրենց մասնագիտական գործունեությունն իրականացնելիս կամ դրանով պայմանավորված՝ լրագրողների թիրախավորման, առերևույթ բռնության դեպքերն անթույլատրելի են, իսկ իրավասու մարմինները պետք է պատշաճ քննարկման առարկա դարձնեն ցանկացած դեպք, որը կարող է վկայել լրագրողի մասնագիտական գործունեությանը խոչընդոտելու մասին»,- նշված է ՄԻՊ հաղորդագրության մեջ։

Արփի Հակոբյան