Լրտեսություն է Վանեցյանի և Փաշինյանի զրույցի գաղտնալսումը, ո՞ւր են պատժվածները, ինչո՞ւ քրգործ չի հարուցվել․ Արթուր Սաքունց. ՏԵՍԱՆՅՈՒԹ

Նիկոլ Փաշինյանն ասուլիսում ասաց, թե «սահմանազատման պրոցեսին դեմ են օտար երկրներում ծվարած նարկոբարոններ, կրիմինալներ, որոնք հավաքագրված են օտարերկրյա հատուկ ծառայությունների կողմից, ՀՀ նախկին բարձրաստիճան պաշտոնյա (ասաց, որ Արթուր Վանեցյանին նկատի ունի), ով հայտնի է նրանով, որ իրեն ձայնագրել են, հրապարակել ձայնագրությունը»։

Ապա այստեղ բացեց փակագծերը․ «Ո՞վ է ասել՝ ողջ ձայնագրությունն են հրապարակել։ Ձայնագրության մի մասն օգտագործվել է որպես ահաբեկման գործիք։ Մենք հստակ տեղեկություն ունենք, որ ձայնագրությունը կատարել է օտարերկրյա հատուկ ծառայության կողմից, իսկ ձայնագրության մյուս մասն օգտագործվել է՝ այդ պաշտոնյային առնվազն որպես ազդեցության գործակալ օգտագործելու»։

ՀՔԱՎ գրասենյակի ղեկավար, իրավապաշտպան Արթուր Սաքունցը, որն այս հարցով ժամանակին զբաղվել է՝ հետամուտ լինելով, որպեսզի իրավական գնահատականներ հնչեն, Factot TV-ին տված հարցազրույցում պնդեց, որ ՌԴ-ն է այն շահագրգիռ պետությունը, որը կիրականացներ գաղտնալսումը։ Նա պահանջեց ՀՀ իշխանություններից քրեական գործ հարուցել և պատժել գաղտնալսման մեղավորներին։

«Ինձ հետաքրքրում է այն հարցը, թե ինչու ապօրինի գաղտնալսման հիմքով չի հարուցվել քրեական գործ, որովհետև գաղտնալսում է տեղի ունեցել, ըստ էության՝ լրտեսական գործունեություն, ինչը քրեորեն պատժելի երևույթ է։ Առանց որևէ իրավական կարգավիճակ ունենալու։ Եվ կապ չունի՝ դա Հայաստանում է, թե՞ որևէ այլ երկրում, նման գաղտնալսումներն արգելված են։ Անձնական խոսակցության իրավունքը կոնվենցիոն իրավունք է, իսկ համաձայն ՀՀ օրենսդրության՝ եթե անձին գաղտնալսում են, երբ չկա դատարանի որոշում, ապա անպայման քրեական գործ պետք է հարուցվի»,- նշեց իրավապաշտպանը։

Արթուր Սաքունցը խոսեց նաև ՀՀ ԱԱԾ-ում լյուստրացիա անցկացնելու՝ քաղհասարակության պահանջների, Ռուսաստանի՝ Հայաստանում ունեցած գործակալական ցանցի կողմից երկրի ինքնիշխանության դեմ վնասարար գործողությունների, քաղաքական դաշտում ռուսական գործակալների գործունեություն ծավալելու, այսօր Մոսկվայում կայացող Փաշինյան-Պուտին հանդիպման ժամանակ այս և այլ խնդրահարույց հարցերի արծարծման անհրաժեշտության, ինչպես նաև եկեղեցականների և ընդդիմության կազմակերպած մայիսի 9-ի հանրահավաքի մասին։

Հարցազրույցն ամբողջությամբ՝ տեսանյութում։

Ռոբերտ Անանյան