10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Հեռակա բանավեճ ՔՊ-ականների և Բագրատ Սրբազանի միջև․ ինչ տեղի կունենա մայիսի 9-ին Երևանում․ ՏԵՍԱՆՅՈՒԹ
Քաղաքականություն
06.05.2024 | 20:32
Արդեն երրորդ օրն է՝ շարունակվում է Տավուշի թեմի առաջնորդ Բագրատ արքեպիսկոպոս Գալստանյանի գլխավորած քայլերթը դեպի Երևան։ Այն սկսվեց Կիրանց գյուղից՝ շուրջ 15-օրյա բողոքի ակցիաներից հետո։ Բագրատ արքեպիսկոպոս Գալստանյանի գլխավորած երթը Երևան է հասնելու մայիսի 9-ին։ Factor TV-ն թեմի առաջնորդից հետաքրքրվեց՝ ի՞նչ սպասել այդ օրը։
«Պատասխան ենք պահանջելու գործած բոլոր ապօրինությունների համար, հատկապես` երկրի սահմանագծման, սահմանազատման հետ կապված։ Հակաօրինական գործընթաց է»,- ասաց նա։
Իշխանության բարձրաստիճան ներկայացուցիչները հոգևորականի քննադատությունները չեն ընդունում։ ԱԺ նախագահ Ալեն Սիմոնյանը լրագրողների հետ զրույցում հակադարձում է՝ նշելով, թե կառավարությունը միակողմանի զիջումների չի գնում, սահմանազատումն էլ իրականացնում են միջազգային նորմերին համապատասխան։
ՔՊ-ն այս շարժումը համարում է երկրում իրավիճակն ապակայունացնող, Ադրբեջանին պատերազմի հրահրելու փորձ՝ ակցիան վերագրելով նախկին իշխանության առանցքային ներկայացուցիչներին։
Բագրատ Սրբազանը նաև ասում է՝ բարձրաստիճան ՔՊ-ականներից ուղերձներ է ստանում, թե ինչպես միանան իր ղեկավարած շարժմանը։ Հոգևորականն այս հայտարարությունն անում է ՔՊ-ականների կողմից իրեն ուղղված սուր քննադատությունների ֆոնին, երբ նրանցից շատերն ԱԺ ամբիոնից անգամ հայտարարում են, որ Տավուշի թեմի առաջնորդին Սրբազան անվանել պետք չէ։ Այնուհանդերձ, կառավարության աշխատակազմն արձագանքեց արքեպիսկոպոսի հայտարարությանը՝ այն որակելով «սուտ ու կեղծիք»։
Ի դեպ, հարց է առաջանում, թե ինչո՞ւ է կառավարության աշխատակազմը՝ պետական մարմինն արձագանքում ՔՊ կուսակցության անդամներին վերագրվող տեղեկությանը։
Տավուշի թեմի առաջնորդը Factor TV-ի հետ զրույցում հայտարարում է, որ իրենց առջև դրված խնդիրը, իր գնահատմամբ, անօրինական սահմանազատումը դադարեցնելն է։ Չնայած Նիկոլ Փաշինյանին ուղղված մեղադրանքերին և սուր քննադատություններին՝ նա Factor TV-ի հարցին ի պատասխան նշում է՝ վարչապետի հրաժարականի պահանջ իրենց օրակագրում չկա։
Եվ չնայած Տավուշի թեմի առաջնորդի այս հավաստիացմանը՝ շարժմանն աջակցող քաղաքացիները սոցիալական ցանցերում այս երթը համարում են իշխանափոխության գործընթացի մեկնարկ և հարց տալիս՝ Նիկոլ Փաշինյանի հնարավոր հրաժարականի դեպքում ո՞վ է ստանձնելու Հայաստանի իշխանության ղեկը։ Այս հարցը Բագրատ արքեպիսկոպոս Գալստանյանին զարմացնում է։
Շարժման ակտիվ մասնակիցներից Սուրեն Պետրոսյանը ևս չի հստակեցնում, թե ինչո՞ւ Նիկոլ Փաշինյանի հրաժարականի պահանջ չեն ձևավորել։ Նա, միաժամանակ, չի բացառում, որ ինչ-որ փուլում նաև երկրի ղեկավարի հրաժարականի հարցը կլինի օրակարգում։ Ըստ նրա՝ բոլոր հարցերի պատասխանները կտրվեն Երևանում։
Մանրամասները՝ տեսանյութում։
Նարեկ Կիրակոսյան
