30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ինչ հարցեր է քննարկել ԱՄՆ դեսպանը Շուշիում
Քաղաքականություն
06.05.2024 | 20:50
Ադրբեջանում ԱՄՆ դեսպան Մարկ Լիբբին Արցախի Շուշի քաղաքից հանդես է եկել տեսաուղերձով՝ նշելով, թե այս այցը նախապատրաստվել է երկու ամիս։
«Շատ ուրախ եմ, որ այսօր Շուշիում եմ։ Մենք նախապատրաստվել ենք այս այցին գրեթե երկու ամիս, և ես ուրախ եմ, որ այն վերջապես տեղի ունեցավ։ Շնորհակալություն ձեր հյուրընկալության համար։ Ես անհամբեր սպասում եմ շարունակելու իմ ճանապարհորդություններն ամբողջ Ադրբեջանում։ Ես շատ տպավորված եմ առաջին ձեռքից տեսնելու, ինչպես է քաղաքը զարգանում»,- նշել է դեսպանը։
Նա հավելել է, որ այցելելու է նաև Վարանդա՝ հանդիպելու պետական պաշտոնյաների և տեղի ուսուցիչների հետ, որոնք մասնակցել են դեսպանատան կողմից իրականացվող անգլերեն լեզվի ծրագրերին:
«Քանի դեռ մենք ունենք գործընկերներ Ադրբեջանում, որոնք ցանկանում են աշխատել մեզ հետ, ԱՄՆ-ը կշարունակի աշխատել այս երկրի տնտեսական զարգացման և նրա ժողովրդի բարեկեցության համար»,- ասել է Լիբին։
Ուշագրավ է, որ մայիսի 3-ին ադրբեջանական լրատվամիջոցների հետ զրույցում դեսպանին հարցրել էին Շուշի գնալու մասին, նա ոչինչ չէր ասել առաջիկա օրերին տեղի ունենալիք այցի վերաբերյալ։
«Ակնհայտ է, որ վերադարձված տարածքները մի փոքր տարբեր են։ Մի քիչ ավելի շատ համակարգում է պահանջվում։ Բայց ես չեմ ուզում գնալ ինչ-որ տեղ՝ ինչ-որ մեկի շոուին մասնակցելու համար։ Այնպես որ՝ երբ ժամանակը գա, ես դա կանեմ»,- ասել էր Լիբբին՝ հայտնվելով ադրբեջանական իշխանական լրատվամիջոցների թիրախում, որոնք կոչ էին արել դեսպանին անցանկալի անձ հայտարարել ու վտարել երկրից։
Շուշիում Մարկ Լիբբին հանդիպել է նաև Ադրբեջանի նախագահ Իլհամ Ալիևի հատուկ ներկայացուցչին։
«Դեսպան Լիբբին հանդիպել է Շուշիի շրջանի հատուկ ներկայացուցիչ Այդին Քերիմովի հետ՝ ավելին իմանալու զարգացման ջանքերի և ներքին տեղահանվածների վերադարձի մասին։ Նրանք նաև քննարկել են տարածաշրջանի կանաչ էներգիան և ԱՄՆ-ի շարունակական աջակցությունն Ադրբեջանի ներքին տեղահանվածներին և ականազերծման նախաձեռնություններին»,- ասվում է դեսպանատան հաղորդագրության մեջ։
Ի դեպ, մինչ ԱՄՆ դեսպանը խոսում է հայաթափված քաղաքի «զարգացման» մասին, Բաքուն շարունակում է տեղում հայկական հետքերի վերացման գործընթացը։ Վերջին օրերին հրապարակված արբանյակային լուսանկարները փաստում են, որ Ադրբեջանն ավերել է Շուշիի հայկական Ղազանչեչցոց գերեզմանոցը, հողին հավասարեցրել Շուշիի Կանաչ ժամը՝ Սուրբ Հովհաննես Մկրտիչ եկեղեցին, ինչպես նաև ամբողջությամբ ավերել Քարին տակ հայկական գյուղը։
Էմմա Չոբանյան
