02.03.2025 | 14:06
Օդի ջերմաստիճանն առաջիկա օրերին աստիճանաբար կբարձրանա 11-13 աստիճանով
Բաքվում ԵՄ դեսպանը՝ Հունգարիայի կողմից ՀՀ-ին օգնության արգելափակման և խաղաղության բանակցությունների մասին
Քաղաքականություն
02.05.2024 | 14:42
Ադրբեջանում ԵՄ պատվիրակության ղեկավար, դեսպան Պյոտր Միխալկոն մեկնաբանել է Հունգարիայի կողմից Հայաստանին ԵՄ Խաղաղության հիմնադրամից 10 մլն եվրոյի աջակցությունը Բաքվի պատճառով արգելափակելու մասին լուրերը։ Ադրբեջանական լրատվամիջոցների հետ մամուլի ասուլիսում նա նշել է, որ ԵՄ-ն ակտիվորեն զարգացնում է հարաբերությունները Հարավային Կովկասի երկրների հետ տարբեր ոլորտներում և Եվրահանձնաժողովը ֆինանսական օգնություն է հատկացնում հարավկովկասյան տարածաշրջանի գործընկերներին։
«Ներկայացվել է տարածաշրջանի երկրների բիզնես-ներդրումային ծրագիրը։ Մենք ունենք համագործակցության առաջնահերթություններ՝ կապված «կանաչ էներգիային» անցնելու, կապի ապահովման և ձեռնարկատերերի աջակցության հետ։ Ինչպես մենք համագործակցում ենք Ադրբեջանի հետ, այնպես էլ համագործակցում ենք այլ երկրների հետ։ Մենք ցանկանում ենք տեսնել Հարավային Կովկաս, որտեղ կա խաղաղություն և բարգավաճում»,- ասել է Միխալկոն։
Նա նաև նշել է, որ ապրիլի 5-ին Բրյուսելում տեղի ունեցած ԵՄ-ԱՄՆ-Հայաստան հանդիպումը զուտ տնտեսական բնույթ է կրել։
«Սա ծառայում է կայունացմանը, և այդ մասին տեղեկացվել է Ադրբեջանը։ ԵՄ-ի ներսում ընդունված ցանկացած որոշում կայացնելու որոշակի մեխանիզմ և ընթացակարգ կա»,- նշել է ԵՄ դեսպանը։
Միխալկոն նաև հայտարարել է, որ ԵՄ-ն գնահատում է Ադրբեջանի և Հայաստանի միջև խաղաղության գործընթացի շարունակությունը, ինչպես նաև ուրախ է առաջընթաց տեսնել երկրների միջև սահմանների սահմանազատման հարցում։
«Մենք ողջունում ենք վերջին քայլը և սահմանազատման համաձայնությունը։ Որոշ ժամանակ առաջ գործընթացին միացել էր ԵՄ-ն և ակտիվ մասնակցում էր ԵՄ Խորհրդի նախագահը, կողմերը սկսել էին համակարգված աշխատել։ Անհրաժեշտության դեպքում՝ ԵՄ-ն պատրաստ է շարունակել աջակցել այս գործընթացին»,- նշել է եվրոպացի դիվանագետը։
Հավելենք, որ «Ազատության» դիվանագիտական աղբյուրները հայտնել էին, որ Հունգարիան արգելափակում է Եվրամիության Խաղաղության հիմնադրամից Հայաստանին աջակցություն տրամադրելու նախագիծը, որի շուրջ դաշինքում նախնական համաձայնություն էր ձեռք բերվել։ Ըստ աղբյուրի՝ Հունգարիան պահանջում է, որ Ադրբեջանը ևս ներառվի ծրագրում, ինչը դրված է քննարկման սեղանին՝ փակուղուց դուրս գալու համար։
Ապրիլի կեսերին էլ «Ազատությանը» հայտնի էր դարձել, որ Բրյուսելում նախնական համաձայնություն է ձեռք բերվել Եվրամիության Խաղաղության հիմնադրամից Հայաստանին 10 միլիոն եվրոյի օգնություն տրամադրելու շուրջ։
Էմմա Չոբանյան
